Дар соли 2011 дар ноҳияҳои камзамини кўҳистон 415 гектар заминҳои нави обёришаванда азхуд ва мавриди истифодабарӣ қарор дода шуд,
гуфт зимни нишасти матбуотӣ вазири мелиоратсия ва хоҷагии оби Ҷумҳурии Тоҷикистон Раҳмат Бобокалонов.
Душанбе, 10 январ. (ТВ "Сафина", Муродов В.) - Ӯ инчунин афзуд, ки дар соли ҷорӣ тибқи нақша 800 гектар заминҳои нав ва аз коркард бозмонда мавриди баҳрабардорӣ қарор дода хоҳад шуд. Дар ин робита беҳтар намудани обёри заминҳои мавзеи 20 солагии Истиқлолияти ноҳияи Ҷиликул, ноҳияҳои Фархор, Ҳисор, Шаҳринав, Мастчоҳ, Ванҷ ва Роштқалъа боиси зикр мебошад.
Муассисаи давлатии «Сарраёсати Тоҷикобдеҳот» ва лоиҳаҳои амалишавандаи назди вазорат соли гузашта оид ба иҷрои «барномаи таъмин намудани аҳолии кишвар бо оби тозаи нўшокӣ барои солҳои 2008-2020» ба маблағи 5,6 милион сомонӣ корҳои таъмиру барқарорсозӣ ва таҷдиди системаҳои оби нўшокиро ба ичро расонданд. Сохторҳо Вазорат барои пойгоҳҳои обкашӣ ва чоҳҳои амудӣ ба миқдори 1, 69 миллиард килловат соат нерўи барқ истифода намуданд, ки он 32, 9 милион сомониро ташкил намуд. Пардохти қарзи истифодаи нерўи барқ 6, 1 милион сомониро ташкил намуд, ки нисбати солпешин ба маротиб зиёд мебошад.
Сабаби асосии зиёд шудани миқдори қарз ин аз ҷониби истифодабарандагон, бахусус хоҷагиҳои кишоварзӣ сари вақт пардохт нагардидани маблағи истифодаи об аст.
Дар нишасти матбуотӣ масъулини Вазорати мелиоратсия ва хоҷагии оби Ҷумҳурии Тоҷикистон посухҳои амиқ ва мушаххас доданд.
