«Қабули консепсияи ислоҳоти хоҷагии манзилию коммуналӣ, ки бо қарори Ҳукумати ҶТ аз 1 июли соли 2010 тасвиб шудааст, яке аз дастовардҳои муҳими соҳа ба шумор меравад.
Душанбе, 12 январ. - Корхонаи воҳиди давлатии «Хоҷагии манзилию коммуналӣ» дар ҳошияи Консепсияи ислоҳоти хоҷагии манзилию коммуналӣ пайваста бо ҳамкорӣ бо Агентии давлатии омор ҷиҳати ҷамъоварии маълумоти ибтидоӣ перомуни вазъи системаҳои таъмини об дар деҳоти ҶТ корҳои заруриро анҷом дод», - гуфт дар нишасти матбуотӣ аз рӯи натиҷаи фаъолият дар соли 2011 директори Корхонаи воҳиди давлатии «Хоҷагии манзилию коммуналӣ» Алимурод Тағоймуродов.
Роҳбари корхонаи воҳиди давлатии «Хоҷагии манзилию коммуналӣ» ҳамчунин зикр намуд, ки дар чаҳорчӯбаи Консепсия ҷиҳати ислоҳоти системаҳои таъмини об ва ба ҳисобгирии техникии хоҷагӣ корҳои назаррас анҷом дода мешаванд.
Қобили зикр аст, ки корхонаи таъмини об ва обу корез дар соли 2011 ба мизоҷон ба маблағи беш аз 28 миллион сомонӣ хидмат расонид. Корхонаҳои фаръӣ дар навбати худ ба аҳолӣ ба маблағи беш аз 14 миллион сомонӣ хидмат расонидаанд.
АМИТ «Ховар»
