Душанбе, 23 декабр. (ТВ "Сафина", М. Зокиров) - Ярмаркаи навбатӣ дар бинои Сирки давлатии Тоҷикистон доир шуд.
Ба иттилои Раёсати агентии давлатии ҳифзи иҷтимоӣ, шуғли аҳолӣ ва муҳоҷират дар шаҳри Душанбе, ин навбат дар ярмарка 100 корхонаву муассисаи пойтахт ширкат варзида, ба корҷўён тақрибан 1850 ҷойи кори нав пешниҳод намуданд.
Омили мусбие, ки аз ярмарка ба ярмарка дар пойтахт ва дигар шаҳру ноҳияҳо бештар эҳсос мешавад, пешниҳоди ҷойҳои корӣ бо маоши баланд мебошад.
Музди миёнаи меҳнате, ки дар ин ярмарка пешниҳод шуд 360 сомониро ташкил медод.
Илова ба ин буданд ташкилоту муассисаҳое, ки ҷойи корро бо 800 сомонӣ ва аз он зиёд пешниҳод намуданд.
Дар ин баробар талабот нисбат ба корҷўён низ зиёдтар мешавад. Масалан Ширкати алюминийи тоҷик Талко қариб ду моҳи охир аст, ки дар ярмаркаҳои ҷойи кор ширкат меварзад ва мутахассисонро бо маоши баланд ба кор даъват мекунад.
Вале то кунун ин ширкат тавонистааст ҳамагӣ 15 нафарро барои фаъолияти доимӣ дар коргоҳашон роҳхат диҳад, ҳол он ки вакансияҳои холӣ дар ин ҷо ба сад наздик аст.
Сабаби кундӣ дар пайдо кардани мутахассисонро бошад роҳбарияти Талко дар сатҳи касбияти корҷўён маънидод мекунанд, ки на ҳама вақт ба талаботи онҳо ҷавобгўст.
Ҳамин гуна ҷойҳои кории холӣ бо маоши баландро Вазорати корҳои дохилӣ ва Вазорати мудофиаи мамлакат низ пешниҳод карда буданд.
Ба маълумоти оморӣ, дар 11 моҳи соли равон тавассути ярмаркаҳо 1007 нафар бо ҷойи кор таъмин шудаанд, ки аз ин 468 нафараш бо ихтисосҳои занона мебошад.