Душанбе, 23 декабр. (ТВ "Сафина", М. Зокиров) - Ба гуфти Раиси Суди олӣ Нусратулло Абдуллоев, пешниҳоди лоиҳаи ин қарорҳо ба Пленуми навбатӣ татбиқи амалияи қонунгузорӣ, пешбурди ҳамаҷониба, пурра ва холисонаи парвандаҳо аз ҷониби мақомоти таҳқиқ ва тафтиши пешакӣ мебошад.
Дар ҷаласаи Пленуми Суди олӣ, намояндагони дигар сохторҳои қонунгузорию ҳуқуқӣ, аз ҷумла Прокурори генералии Ҷумҳурии Тоҷикистон, Раиси Шўрои адлия, аъзои Шўрои илмию машваратии Суди Олӣ, раисони судҳои вилоёт ва шаҳру ноҳияҳо низ ширкат варзида, вобаста ба масъалаҳои мавриди назар ибрози андеша намуданд.
Аз ҷумла Прокурори генералӣ Шерхон Салимзода вобаста ба моҳияти мантиқии қарори Суди Олӣ «Дар бораи аз ҷониби судҳо татбиқ намудани қонунгузорӣ оид ба ҳифзи шаъну шараф ва эътибори кории шаҳрвандон ва шахсони ҳуқуқӣ» нуктаи назари худро баён дошта, таъкид намуд, ки дар таҳияи ин қарор ба хатогиҳои забониву мантиқӣ роҳ дода шудааст.
Дар бастагӣ ба ин, пешниҳод шуд, ки ибораи «эътибори кории шаҳрванд» ба ибораи «шўҳрати кории шаҳрванд» иваз карда шавад.
Ин имкон медиҳад, ки ташхиси забонии парвандаҳои марбут ба масъалаи паст задани нуфузу эътибори шаҳрвандон ҳарчи холисонатар баҳогузорӣ карда шавад.
Дигар ширкаткунандагони ҷаласаи пленум низ вобаста ба бандҳои алоҳидаи қарори мазкур фикру андешаҳои гуногун пешниҳод намуданд.
Ҳамин тариқ баъд аз муҳокима ва андешарониҳо вобаста ба қарорҳои Суди олӣ хулосаҳои зарурӣ бароварда шуд.