Дар Вазорати корҳои хориҷии ҶТ табодули ёддоштҳо миёни Ҳукумати Тоҷикистон ва Ҷопон аз рӯи лоиҳаи таҷдиди роҳҳо дар қитъаи Қӯрғонтеппа - Дӯстӣ баргузор гардид.
Душанбе, 12 декабр. - Ҳуҷҷатро вазири корҳои хориҷии ҶТ Ҳамрохон Зарифӣ ва Сафири Ҷопон дар Тоҷикистон Хироюки Имахаши имзо намуданд.
Ҳамчунин созишномаи байни Ҳукумати Тоҷикистон дар шахсияти Ҳамрохон Зарифӣ ва роҳбари Намояндагии Агентии ҳамкории байналмилалии Ҷопон дар ҶТ Ҷиро Иида ҷиҳати татбиқи лоиҳаи кӯмаки бебозгашт имзо гардид. Қобили зикр аст, ки Ҳукумати Ҷопон барои рушди бахшҳои мухталифи иқтисодиёт, кишоварзӣ маориф, тандурустӣ ва фарҳанги Тоҷикистон аз соли 1993 то соли 2011 беш аз 15,3 миллиард иени ҷопонӣ ҷудо кардааст, ки тақрибан 184 миллион доллари ИМА – ро ташкил медиҳад.
Дар ин бора аз Раёсати иттилоот, матбуот, таҳлил ва тарҳрезии сиёсати хориҷии ВКХ ҶТ хабар доданд.
