Аз соли 2002 инҷониб бо қарори ташкилоти ҷаҳонии ЮНЕСКО 29-уми ноябр ҳамчун рўзи фалсафа дар қаламрави 195 кишвари аъзои ин ташкилот қайд карда мешавад.
Душанбе, 29 ноябр. (ТВ "Сафина", З.Ҷавакова) - Институти фалсафа ва сиёсатшиносии ба номи Баҳовуддинови Академияи илмҳои Ҷумҳурии Тоҷикистон низ ин санаро бо баргузории як конференсияи илмӣ қайд намуд.
Қабл аз оғози конфронс роҳбарияти Академияи илмҳо номаи табрикотии директории генералии ЮНЕСКО, Ирина Боковаро дар назди аҳли илм қироат намуда, ҳамаи иштирокчиён, олимону устодони соҳаи фалсафаро ба ин рўз табрик карданд.
Дар баробари ин барои хизматҳои арзанда дар илми фалсафаи тоҷик ва тайёр намудани кадрҳои баландихтисос ба 4 нафар доктори илмҳои фалсафа, нишони фахрии Академияи илмҳои Ҷумҳурии Тоҷикистон супорида шуд.
Пас аз итмоми бахши тантанавӣ маърўзаҳои олимон атрофи мавзўъҳои «Фалсафа ҳамчун ҳаёт ва маърифат», «Ташкил ва таҳқиқи проблемаҳои таърихи фалсафаи тоҷик», «Хусусиятҳои умумии муносибати мутақобилаи фалсафа ва дин дар таърихи фарҳанги тоҷик» манзури ширкаткунандагони ҳамоиш карда шуд.
