Душанбе, 24 ноябр. (ТВ "Сафина", М. Зокиров) - Хати маши роҳпаймоии шаҳрвандони ин ноҳия аз майдони назди Маҷмааи давлатии Кохи Ваҳдати пойтахт шурўъ шуд.
Новобаста ба вазъи боронии ҳаво, ба хотири иштирок дар ин чорабинии муҳим ҳазорон нафар маскунини ин ноҳия, махсусан ҷавонону наврасон гирди ҳам омада буданд.
Ташкилоту муассисаҳои истеҳсолию таълимии ноҳия низ дар ин ҳамоиши оммавӣ хеле фаъол буданд.
Роҳбарияти мақомоти иҷроияи ҳокимияти давлатӣ дар шаҳри Душанбе ва ноҳияи Исмоили Сомонӣ ҳам ба гирдиҳамомадагон пайваста, расо соати 11 роҳпаймоиро ҳусни оғоз бахшиданд.
Хати сайри ҷамъомадагон тавассути кўчаи марказӣ бо гардиши хиёбони Исмоили Сомонӣ ба самти Майдони Парчами давлатӣ идома ёфт.
Тўли ин роҳ парчамҳо болои сар мардуми ҷамъомада суруди ватан дар лаб ва меҳри ватан дар қалб васфи диёри зебоманзар мекарданд.
Гуфтанист, ки ин солҳо рўҳияи ватандўстиву меҳанпарастии мардуми кишвар хеле боло рафтааст.
Инро аз чеҳраи ҳар як тан аз иштироккунандагони роҳпаймоии Рўзи Парчам дар ноҳияи Исмоили Сомонӣ, ки баъдан ба издиҳоми калони ҷамъомади асосии идона дар назди Парчами бузурги миллӣ пайвастанд, мушоҳида кардан мумкин буд.
Дар ин сатҳ таҷлил намудани Рўзи Парчами миллӣ, ки тўли се сол нахустин маротиба аст, бешак ба ҳуввияти милливу худшиносии мардум таъсири амиқ хоҳад расонид.