Душанбе, 23 ноябр. (ТВ "Сафина", В.Муродов) - Ширкаткунандагони чорабинӣ аз афзалияти мавҷудияти ин арзиши миллӣ сухан гуфта, таъкид доштанд, ки қабули Парчам ҳамчун асоси давлатдорӣ имконият фароҳам овард, ки Тоҷикистон ба сифати кишвари соҳибистиқлол аз ҷониби ҷомеаи ҷаҳонӣ эътироф гардад. Барафрохтани парчам ва дирафш дар осори ниёгон ҳамчун муносибати ифтихоромези мардуми ориётабори тоҷик ба муқаддасоти миллӣ таҷассум гардидааст. Ба ин хотир мавҷудияти рамзҳои давлатӣ бешубҳа ба ҳайси арзишҳои миллӣ шомил мешаванд ва он ифтихори ҳар шаҳрванди мамлакат аст.
Ҳамзамон ширкаткунандагони ҷамъомад таъкид доштанд, ки ҳифзи парчам ва дигар рамзҳои давлатӣ аз таҳкими решаҳои худшиносиву ватандўстӣ дар ҷомеаи Тоҷикистон гувоҳӣ медиҳад.
Қайд гардид, ки комиссияи махсуси давлатӣ, ки дар ҳайаташон олимон ва таърихшиносон шомил баданд дар давоми 8 моҳ барои интихоби рамзҳои миллӣ аз ҷумла парчами давлатӣ корзиёдро анҷом доданд. Ва ниҳоят 24 ноябри соли 1994 дар Иҷлосияи 16-уми Шўрои Олии Ҷумҳурии Тоҷикистон парчами кунунии давлати ҳамчун рамзи давлати соҳибистиқлоли тоҷикон интихоб гардид.
Бояд гуфт, ки парчам дар низоми давлатдорӣ ва умуман дар ҳаёти ҳамаррўзаи ҳар як фарди худогоҳу хештаншинос нақш ва мавқеи хосаи худро дорад.