Душанбе, 23 ноябр. (ТВ "Сафина", М.Зокиров) - Дар маҷлиси тантанавии кормандони Хадамоти гумруки назди Ҳукумати Ҷумҳурии Тоҷикистон Ваколатдор оид ба ҳуқуқи инсон Зариф Ализода ширкат варзида, гумрукчиёнро бо фаро расидани ин санаи муҳим таҳният гуфт.
Ҳангоми суханрониҳо аслан ба пайдоишу мавриди амал қарор додани Парчам ҳамчун субъект ва ё воситаи асосии эъломи истиқлолияту озодӣ дахл карда шуд.
Таъкид гардид, ки инсон нахустин маротиба Парчамро ҳамчун рамзи мустақилият ҳанўз се ҳазор сол пеш мавриди баҳрабардорӣ қарор дод, ки он хусусиятҳои хосу фарқкунандаи фарҳангу тамаддуни ҳар як халқу миллатро ифода мекард.
Дар тўли асрҳо парчамдор будани тоҷиконро Дирафши Ковиёниву Ливои Ҳахоманишиён ва Сосониён ва давлатҳои баъдии миллати мо тасдиқ мекунад.
Тоҷикистони навин ҳам аз лаҳзаҳои аввали мустақилият Парчами худро таҳияву тасдиқ кард, ки шаклу сохти он ормону орзуҳои ҳазорсолаҳои миллатро ифода мекунад.
Дар ҳамин бастагӣ бунёду поягузории баландтарин парчами дунё дар Душанберо иштирокчиёни маҷлиси тантанавии Хадамоти гумрук на нишони худнамоӣ, балки амалӣ сохтани орзуҳои ҳазорсолаи мардум дар самти расидан ба мустақилияти комили давлатӣ унвон карданд.