Душанбе, 2 ноябр. (ТВ «Сафина», М. Зокиров). - Дар ҷаласа панҷ масъала: оид ба Лоиҳаи Қарори Маҷлиси намояндагони Маҷлиси Олии Ҷумҳурии Тоҷикистон «Дар бораи бозхонд намудани муовини раиси Комиссияи марказии интихобот ва раъйпурсии Ҷумҳурии Тоҷикистон», оид ба Лоиҳаи Қарори Маҷлиси намояндагони Маҷлиси Олии Ҷумҳурии Тоҷикистон «Дар бораи интихоб намудани муовини раиси Комиссияи марказии интихобот ва раъйпурсии Ҷумҳурии Тоҷикистон», Оид ба Лоиҳаи Қарори Маҷлиси намояндагони Маҷлиси Олии Ҷумҳурии Тоҷикистон «Дар бораи интихоб намудани узви Комиссияи марказии интихобот ва раъйпурсии Ҷумњурии Тоҷикистон» , Оид ба лоиҳаи Қонуни Ҷумҳурии Тоҷикистон «Дар бораи Буҷети давлатии Ҷумҳурии Тоҷикистон барои соли 2012» ва Дар бораи Лоиҳаи Барномаи давлатии қарзгирии берунаи Ҷумҳурии Тоҷикистон барои соли 2012-2014» мавриди муҳокимаву баррасии аъзои Маҷлиси намояндагон қарор гирифт. Бо сабаби фавт ваколатҳои муовини раиси Комиссияи марказии интихобот ва раъйпурсии Ҷумҳурии Тоҷикистон марҳум Кароматулло Холиқов бозхонд шуда, номзадии Ректори Донишкадаи иқтисодии Тоҷикистон Нозимҷон Нидоевро вакилони мардумӣ барои интихоб шуданаш ба ин мансаб ҷонибдорӣ намуданд. Ҳамчунин тариқи овоздиҳии кушода вакилони Маҷлиси намояндагон номзадии Котиби илмии Институти фалсафа Ҷамшед Ҷамшедовро ба узвияти Комиссияи марказии интихобот ва раъйпурсии Ҷумҳурии Тоҷикистон ҷонибдорӣ карданд. Вобаста ба масъалаи чоруми рўзномаи маҷлис-Дар бораи буҷети давлатии Ҷумҳурии Тоҷикистон барои соли 2012, Вазири молияи кишвар Сафаралӣ Наҷмиддинов баромад намуда, бандҳои алоҳидаи буҷетро ба таври алоҳидагӣ шарҳ дод. Аз ҷумла гуфта шуд, ки буҷети соли оянда дар ҳаҷми бештар аз 10 миллиарду 160 миллион сомонӣ ба нақша гирифта шудааст, ки ин рақам нисбат ба соли гузашта фаротар аз 1 миллиард сомонӣ зиёд аст. Мутобиқ ба сохтори давлатдорӣ дар буҷети соли оянда низ афзалияти бештар ба соҳаҳои иҷтимоию иқтисодӣ дода шудааст. Дар соли 2012 низ хароҷоти буҷети давлатӣ нисбат ба иҷроиши он бештар хоҳад буд. Сабабҳои асосии касри буҷети соли оянда ҳамоно пардохт нашудани базъе намуди андозҳо ва афзоиши бақияи андоз мебошад, иттилоъ дод вазири молия. Тибқи маълумот танҳо дар нўҳ моҳи соли равон бақияи андоз то 180 миллион сомонӣ афзоиш ёфтааст, ки сабабгори асосии ин ҳолат пардохт нашудани андоз аз ҷониби корхонаҳои бузурги андозсупоранда, аз ҷумла Ширкати Холдингии Барқи тоҷик мебошад. Аз роҳбарони Барқи тоҷик ва дигар вазорату идораҳои дахлдор қатъан даъват ба амал оварда шуд, ки проблемаҳои дар сохторашон ҷойдоштаро саривақт ва бекаму кост бартараф намуда, дар таъмини иҷрои буҷети давлатӣ талоши бештар намоянд.