Душанбе, 17 октябр. - Дар ин хусус Комиссияи марказии интихобот ва раъйпурсии Ҷумҳурии Тоҷикистон дар ҷаласаи худ, ки 17 октябр таҳти раёсати Шермуҳаммади Шоҳиён, раиси Комиссияи марказии интихобот ва раъйпурсии ҷумҳурӣ баргузор гардид, қарор қабул кард.

Дар ҷаласа ҳамзамон, тақвими чорабиниҳои асосӣ доир ба тайёрӣ ва гузаронидани интихоботи вакили Маҷлиси намояндагони Маҷлиси Олии Ҷумҳурии Тоҷикистон ба ивази вакили хориҷшуда дар ҳавзаи якмандатии интихоботии Шоҳмансур №3 тасдиқ гардид. Тибқи он Комиссияи ҳавзавӣ ва участкаҳои интихоботӣ ташкил карда шуда, пешбарии номзадҳо аз 19 октябр шурӯъ гардида, 3 ноябр анҷом меёбад. Бақайдгирии номзадҳо муддати як моҳ, қабл аз интихобот оғоз гардида, то 19 ноябр идома меёбад.

Интихобкунандагон дар ҳавзаю комиссияҳои интихоботӣ 18 декабри соли 2011 аз соати 6. 00 то 20. 00 раъй медиҳанд. Натиҷаҳои пешакии интихобот баъд аз 24 соат, яъне 19 декабри соли 2011 эълон мешаванд.

Бояд тазаккур дод, ки 12 октябри соли 2011 бо Қарори Маҷлиси намояндагони Маҷлиси Олии Ҷумҳурии Тоҷикистон ваколатҳои вакили Маҷлиси намояндагони Маҷлиси Олии Ҷумҳурии Тоҷикистон Сафаралӣ Раҷабов бо сабаби вафоташ пеш аз мӯҳлат қатъ карда шуд. Аз ин рӯ, дар ҳавзаи якмандатии интихоботии Шоҳмансур №3 интихоботи Маҷлиси намояндагони Маҷлиси Олии Ҷумҳурии Тоҷикистон ба ивази вакили хориҷшуда гузаронида мешавад.