Чопи «Садои Осиё» дар Теҳрон
14 октябр 2011 | Хонданд: 287 нафар | Ҷамъият
Нахустин бор дар Эрон маҷмӯаи ашъори шоири бузурги тоҷик, вассофи сулҳу дӯстӣ- Мирзо Турсунзода таҳти унвони «Садои Осиё» нашр гардид.
Чопи китоби мазкур ба ифтихори 100-солагии Қаҳрамони Тоҷикистон, муборизи матини роҳи сулҳу озодӣ ва тарғибгари дӯстиву рафоқат Мирзо Турсунзода эҳдо гардидааст.
Китобро нашриёти «Рӯзгор» бо теъдоди 1000 нусха ба табъ расонидааст.
Мирзо Муллоаҳмадов, донишманди тоҷик зери унвони «Вассофи озодии Шарқ» ба маҷмӯа сарсухан навиштааст. Олими тоҷик дар маҷмӯа шарҳи ҳоли шоири тавоноро ҷой намуда, мавзӯъҳои муҳими ашъори адиби тавоноро ба риштаи таҳлил кашидааст.
