Душанбе, 14 октябр. (ТВ «Сафина», М. Зокиров). - Дар баробари ин илми тибби замонавӣ ҳам бо суръати кайҳонӣ пеш меравад ва табиист, ки навгониҳои соҳа дар саросари олам дар ҷойе барвақттару дар ҷойи дигар каме дертар паҳн мешавад. Кормандони соҳаи ҷарроҳии Тоҷикистон худро дар ин мусобиқа яке аз пешгомҳо медонанд.

Маротибаи панҷум аст, ки дар мамлакат анҷумани ҷарроҳони кишвар баргузор мегардад. Ба андешаи мутахассисони соҳа маҳз баргузории чунин ҳамоишҳо ба рушди бахши ҷарроҳии мамлакат заминави назариявӣ мегузорад. Дар анҷумани панҷуми ҷарроҳони Тоҷикистон, ки дар Донишгоҳи Давлатии Тиббии кишвар ба номи Абўалӣ Ибни Сино баргузор гардид, теъдоди зиёди кормандони соҳа аз дохил ва хориҷи мамлакат ширкат варзиданд. Гуфта шуд, ки татбиқи босамари барномаҳои ислоҳии Ҳукумати ҷумҳурӣ воқеан ҳам ба рушди соҳаи беҳдоштӣ ва шохаҳои алоҳидаи он, аз ҷумла бахши ҷарроҳӣ мусоидати фаъол кард. Махсусан фароҳам овардани шароити мусоид барои инкишофи якхелаи тибби ҷамоавӣва тибби хусусӣ рақобати солимро дар соҳа ба миён овард, ки ин дар навбати худ боиси рушду инкишофи бесобиқаи соҳаи беҳдоштӣ шуд. Имрўз ҷарроҳони тоҷик аз технологияву назарияҳои муосири соҳавӣ пурра бархўрдоранд ва зина ба зина амалиёти душвортарини ҷарроҳиро низ дар дохили мамлакат анҷом медиҳанд. Ин нуқта дар суханронии асосгузорони соҳаи ҷарроҳии мамлакат, ки насли солҳои 60-уму 70-уми асри гузаштаанд, тасдиқи худро ёфт ва онҳо аз дастовардҳои шогирдони худ дар ин самт истиқболи гарм намуданд. Анҷумани панҷуми худро ҷарроҳони Тоҷикистон омили таъсирбахши мусоидаткунанда ба ҳаллу фасли муштараки баъзе паҳлўҳои норавшану баҳсталаби соҳа маънидод карданд.