«Ҷойгоҳи Мирзо Турсунзода дар адабиёти тоҷики садаи бист» конфронси илмӣ баргузор гардид.

Душанбе, 11 октябр. (ТВ «Сафина», З.Ҷавакова). –Дар конфронс аз ҷониби ходимони илм перомуни мавзўъҳои «Симои устод Садриддин Айнӣ дар эҷодиёти Мирзо Турсунзода», «Ҷойгоҳи Мирзо Турсунзода дар адабиёти Иттиҳод», «Сохтори наҳвии як шеъри устод Мирзо Турсунзода», «Симои зан дар эҷодиёти устод» маърўзаҳо шунида шуд. Таъкид гардид, ки эҷодиёти ин адиби тавоно бо сифатҳои баланди ғоявию бадеӣ, ҷанбаҳои суннатӣ ва вижагиҳои дигари худ дар таърихи адабиёти муосири тоҷик нақши бориз гузоштааст. Осори ў на танҳо дар дохил, балки дар хориҷи кишвар низ хонандаи зиёд дорад. Гуфта шуд, ки устод Мирзо Турсунзодаро дар ҷаҳон нерўи бузурги истеъдоду маҳорати эҷодӣ ва интихоби мавзўъҳои рўзмарра дар асарҳояш машҳур кард. «Қиссаи Ҳиндустон» аз ҷумлаи чунин асарҳои сатҳи ҷаҳонии шоир унвон гардид, ки солҳои баъдӣ дар пайравӣ ба он намояндагони бисёр қавму миллатҳои ҷаҳон асарҳои бузург офаридаанд.

Ҳамчунин ҳамкорон ва шогирдони Турсунзода хотираҳои худро аз даврони зиндагӣ ва фаъолияти устод дар назди ҳозирин нақл карданд.