6 октябр дар шаҳри Душанбе таҳти раёсати Шермуҳаммади Шоҳиён, Раиси Комиссияи марказии интихобот ва райъпурсии ҷумҳурӣ ҷаласаи Комиссияи мазкур баргузор гардид.
Душанбе, 6 октябр. - Дар ҷаласа масъалаи додани мандати вакили Маҷлиси намояндагони Маҷлиси Олии Ҷумҳурии Тоҷикистон аз ҳавзаи ягонаи умумиҷумҳуриявӣ ба Ашӯрбег Расулов баррасӣ гардид.
Зикр шуд, ки тибқи талаботи моддаи 57-и Қонуни конститутсионии Ҷумҳурии Тоҷикистон «Дар бораи интихоботи Маҷлиси Олии Ҷумҳурии Тоҷикистон» дар сурати пеш аз мӯҳлат қатъ гардидани ваколати вакиле, ки дар натиҷаи тақсимоти мандатҳои вакилӣ дар байни ҳизбҳои сиёсӣ интихоб шудааст, мандати вай бо қарори Комиссияи марказии интихобот ва райъпурсии Ҷумҳурии Тоҷикистон ба номзаде, ки баъд аз интихобшудагон дар рӯйхати дахлдор қарор дорад, дода мешавад.
Азбаски вакили Маҷлиси намояндагони Маҷлиси Олии Ҷумҳурии Тоҷикистон Алиев Ҳусейн бо Фармони Президенти Ҷумҳурии Тоҷикистон иҷрокунандаи Раиси ноҳияи Тоҷикобод таъин шуд, мандати ӯ аз рӯйхати дахлдори Ҳизби ҳалқии демократии Тоҷикистон бо қарори Комиссия ба Расулов Ашӯрбег дода шуда, ҳамчун вакил ба қайд гирифта шуд ва ваколаташ тасдиқ гардид.
