Дар бинои марказии Донишгоҳи миллии Тоҷикистон дар мавзўи «Масъалаҳои мубрами таърихи тоҷикон ва форсизабонони ҷаҳон» Конференсияи илмию амалӣ баргузор гардид.
Душанбе, 26 сентябр. (ТВ «Сафина», М. Ҳусейнов). - Ректори донишгоҳ Нуриддин Саидов ба кори Конференсия ҳусни оғоз бахшида, иброз дошт, ки тоҷикон дорои таърихи бою рангин буда, муҳақиқону таърихшиносон ҳам бо истифода аз ин махзани бузург асарҳои зиёде эҷод кардаанд. Дар ҳамоиш устодони Донишгоҳи миллӣ ва дигар коршиносони соҳа бо маърўзаҳои пурмўҳтаво баромад намуданд. Тавре зикр гардид, дар ҳама давру замон таърих муаррифгари гузаштаи давлату миллат буда, ҳамчун маҳаки асосӣ дар бунёди ҷомеаи нав барои ҳамаи кишварҳои рўйи олам дониста мешавад. Дар Конференсия ҳамчунин асарҳои доктори илми таърих, профессор Мансур Бобохонов ва китобҳои дигар таърихшиносони ҷумҳурӣ ба намоиш гузошта шуд. Иштирокчиёни ҳамоиш ташкили чунин як Конференсияи илмӣ-амалиро дар бозшиносию бозомўзии таърихи тоҷикон фоли нек хонда, зикр намуданд, ки асару маърўзаҳои пешниҳод гардида барои донишҷўён дарси хуби ихтисосӣ мебошад.
