Шурӯъ аз 25 август то 5 сентябри соли 2011 шомгоҳон ҳаракати нақлиёт дар майдони марказии пойтахт- «Дӯстӣ» муваққатан манъ карда мешавад.
Душанбе, 23 август. - Дар ин хусус Зиёратшо Хушов, муовини сардори шӯъбаи Бозрасии давлатии автомобилии шаҳри Душанбе иттилоъ дод.
Сабаби муваққатан манъ кардани ҳаракати нақлиёт дар майдони марказии пойтахт омодагӣ ба ҷашни 20-умин солгарди Истиқлолияти давлатии Ҷумҳурии Тоҷикистон бинобар баргузории машқҳои омодагӣ ҷиҳати гузашти низомӣ (парад) мебошад.
Зиёратшо Хушов зикр кард, ки нақлиёти ҷамъиятӣ ва шахсӣ аз соати 18.00 то 22.00 имкон дорад тавассути кӯчаҳои ҳамшафати майдони «Дӯстӣ» , ба мисли кӯчаҳои Шероз, Айнӣ, Шевченко, Сомонӣ, Мирзо Турсунзода ҳаракат намояд.
Бояд тазаккур дод, ки ба ифтихори 20-умин солгарди ҷашни Истиқлолияти давлатии Ҷумҳурии Тоҷикистон дар майдони «Дӯстӣ»-и пойтахт гузашти низомӣ баргузор мегардад, ки дар он 10 ҳазор нафар сарбозону афсарони Қувваҳои Мусаллаҳи ҷумҳурӣ ва дигар ҷузъу томи сохторҳои қудратии кишвар ширкат менамоянд.
