Душанбе, 10 август. - Ҳадаф аз таъсиси ин ганҷина посух гуфтан ба бахше аз ниёзҳои пажӯҳишгарон ҷиҳати дастрасӣ ба китобу адабиёт ва дастовардҳои илмию фарҳангӣ ва иҷтимоии тоҷикон ва ошноӣ бо китобҳои дар Эрон нашршуда аст, ки бо Тоҷикистон алоқамандӣ доранд.

Дар маросими ифтитоҳи китобхонаи пажӯҳишӣ Давлаталӣ Ҳотамов, Сафири Ҷумҳурии Тоҷикистон дар Ҷумҳурии Исломии Эрон, Муҷтаҳиди Шабистарӣ, Раиси Анҷумани дӯстии Тоҷикистону Эрон, Раҳимӣ, Раиси маркази ҳамоҳангсозии анҷуманҳои дӯстии Вазорати корҳои хориҷии Эрон, меҳмонон аз анҷуманҳои дӯстии Канада, Олмон, Индонезия, Ҷопон, Бразилия, донишмандон аз Фарҳангистони забон ва адаби форсӣ, Бунёди байналмилалии башардӯстӣ, Анҷумани дӯстдорони Ҳофиз ва дигар намояндагони илму адаб аз Тоҷикистону Эрон ва Туркия ширкат намуданд.

Иштирокдорони маросим ифтитоҳи китобхонаи пажӯҳиширо қадами устувор дар тавсеаи ҳамкориҳои илмию фарҳангии Тоҷикистону Эрон арзёбӣ карданд.