Душанбе, 8 август. - Ба гуфти мудири шӯъбаи пешгӯии боду ҳавои Муассисаи давлатии обуҳавошиносии ҷумҳурӣ Парвина Саидҷамолова баланд рафтани дараҷаи ҳарорати ҳаво дар ҷумҳурӣ чанд соли охир мушоҳида шудааст. Ҳафтаи гузашта баландтарин дараҷаи ҳаво дар ҷумҳурӣ мушоҳида гардид, рӯзона гармии ҳаво дар вилояти Хатлон ба 40 – 42 дараҷа, дар вилояти Суғд – 40- 43 дар ВМКБ ба 30 -38 ва дар ноҳияи Дарвози ин вилоят бошад, ҳарорати ҳаво то ба 42 дараҷа расид.

Ба иттилои манбаъ, сабаби асосии беш аз 40 дараҷа баланд шудани ҳарорати ҳаво, аз қисмати ҷануби кишвар ворид шудани ҳавои гарму хушки биёбонҳои Арабистони Саудӣ будааст.

Ба гуфти П.Саидҷамолова интизор меравад, ки вазъи имрӯзаи гармиро «боди афғонӣ» иваз карда, ҳарорати ҳаворо то 37 дараҷа гармӣ паст намояд. Баландшавии ҳарорати ҳаво дар Тоҷикистон ҳодисаи муқаррарӣ аст, он дар солҳои 1982-83, 84, 1990 -94, 95 ва соли 1997 низ бо чунин ҳарорат мушоҳида шудааст.