Душанбе, 18 июл. - Назар ба иттилои Абдураҳим Холиқов, Раиси Кумитаи оид ба корҳои дини назди Ҳукумати ҷумҳурӣ, дар нимсолаи равон дар ҷумҳурӣ наздик ба 55 ҳазор маърака барпо гашта, хароҷоти онҳо беш аз 137 миллион сомониро ташкил дод.

Алҳол барои татбиқи қонуни мазкур дар шаҳру ноҳияҳои кишвар қариб 500 комиссияи доимӣ ва беш аз 800 комиссияи ҷамъиятӣ фаъолият дошта, дар ин давра дар 25 вазорату идораҳои давлатӣ ва зерсохторҳои онҳо санҷишҳо гузаронида шуданд.

Инчунин аз ҷониби мақомоти дахлдор нисбат ба шахсоне, ки берун аз доираи қонун фаъолият намуда, ба қонуншиканӣ роҳ додаанд, тадбирҳои зарурӣ андешида шудааст. Бахусус, аз ҷониби судҳои ҷумҳурӣ нисбат ба 128 парванда қарорҳои дахлдор қабул гардида, аз шахсони гунаҳгор ба маблағи беш аз 300 ҳазор сомонӣ ҷарима ситонида шудааст.
Бояд зикр кард, ки шаҳрвандони кишвар бо кам намудани хароҷоти маъракаҳо ва пасандоз намудани маблағҳо имкони беҳтар сохтани шароити зиндагиро ба даст оварданд. Қабули қонун «Дар бораи танзими анъана ва ҷашну маросимҳо дар Ҷумҳурии Тоҷикистон» ба беҳдошти вазъи иҷтимоии ҷомеаи Тоҷикистон, фароҳам овардани шароити таҳсили кӯдакон, эъмори манзилҳои истиқоматӣ ва сарфаю сариштакорӣ мусоидат намуд.