Бегоҳии 29 июн Президенти Ҷумҳурии Тоҷикистон Эмомалӣ Раҳмон Роҳбари маъмурияти Президенти Федератсияи Россия Сергей Наришкин ва вазири мудофиаи ин кишвар Анатолий Сердюковро ба ҳузур пазируфт.
Душанбе, 30 июн. - Дар фарҷоми мулоқот бо Президенти Ҷумҳурии Тоҷикистон Эмомалӣ Раҳмон С. Наришкин ба хабарнигорон андешаҳояшро чунин баён намуд:
«Дар мулоқот масоили муҳими муносибатҳои дуҷониба ва бисёрҷонибаи Тоҷикистону Россия, аз ҷумла дар ҷаҳорчӯбаи Иттиҳоди Давлатҳои Мустақил ва сафари қарибулвуқӯи давлатии Президенти Россия Дмитрий Медведев ба Тоҷикистон, ки аввали моҳи сентябри соли ҷорӣ дар назар аст, баррасӣ гардиданд».
Вай афзуд, ки дар ҷараёни мулоқот мавзӯъҳои саммити роҳбарони давлатҳои аъзои ИДМ, «Чоргонаи Душанбе» - Тоҷикистон, Афғонистон, Покистон ва Россия, ки моҳи сентябри соли ҷорӣ дар шаҳри Душанбе баргузор мегардад, муҳокима шуд.
Тибқи суханони С. Наришкин дар рафти сафари Президенти Россия ба Тоҷикистон ба имзорасии Барномаи ҳамкориҳои иқтисодии ду кишвар барои солҳои 2011-2014 дар назар аст.
«Дар мулоқот, ҳамчунин ба маҷмӯи васеи масъалаҳои ҳарбӣ, ҳарбӣ-техникии ду кишвар ва дигар масоил таваҷҷӯҳи тарафҳо мубодилаи афкор сурат гирифт», - гуфт дар хотима С. Наришкин.
