Қабл аз ҳама мехоҳам таъкид намоям, ки мо мулоқоту музокироти дар рафти ин боздид аз Люксембург доиргаштаро идомаи муколамаи мунтазами сиёсии миёни Ҷумҳурии Тоҷикистон ва Люксембурги дўст арзёбӣ менамоем.

Дар музокироту сўҳбатҳое, ки бо Волоҳазрат Герсоги Бузург ва Сарвазири Люксембург доир шуданд, дар фазои гарму ҳамдигарфаҳмӣ ва самимӣ ҳолати кунунӣ ва имкониятҳои дар самтҳои ояндадор мушаххас гардондани ҳамкориҳои ду кишвар мавриди баррасӣ қарор гирифтанд.

Зимнан таъкид гардид, ки ҷониби Тоҷикистон Иттиҳоди Аврупо ва кишварҳои аъзои онро аз шарикони муҳими байналмилалии худ ва ҳамкориҳои созанда бо онҳоро омили муҳими рушди худ медонад.

Дар ин замина мо ба аҳамияти хоса додани ҷониби Тоҷикистон ба ҳамкориҳои гуногунҷанба бо Люксембург, ки дар умури иқтисодию сиёсӣ ва иҷтимоии Аврупо нақши назаррас дорад, ишора кардем.

ҷониби Тоҷикистон бо изҳори қаноатмандӣ аз марҳилаи фаъоли ташаккулёбии муносибатҳои ду кишвар дар соҳаҳои мавриди таваҷҷўҳи тарафайн, дар ишора ба имкониятҳои фаровоне, ки дар муносибатҳои дуҷониба мавҷуданд, ҳавасмандии худро ба рушди ҳамшарикии васеъ бо Люксембург зоҳир кард.

Вобаста ба ин мо ба имзо расидани як қатор созишномаҳои дуҷонибаро, ки ба пешбурди муваффақонаи ҳамкориҳои мо дар соҳаҳои тиҷорату иқтисод, сармоягузорӣ ва дигар бахшҳои марбута нигаронда шудаанд, хуш мепазирем ва қабули онҳоро шаҳодати таваҷҷўҳи пайвастаи ҳар ду ҷониб ба таҳкими пояҳои аҳдномавию ҳуқуқии муносибатҳои дуҷониба арзёбӣ менамоем.

ҳамзамон бо мавзўъҳои марбут ба рушди минбаъдаи муносибатҳо байни ду кишвар, ҷонибҳо атрофи масъалаҳои минтақавӣ ва байналмилалии мавриди таваҷҷўҳи тарафайн мубодилаи афкор намуданд.

Зимни баррасии масоили рўзмарраи минтақавию байналмилалӣ мо атрофи вазъияти Афғонистон ибрози ақида намудем ва мубодилаи афкор атрофи он мувофиқат ва наздикии мавқеъҳои моро нисбат ба масъалаҳои мубрами ҷаҳони муосир нишон дод.

Дар робита ба ин аз ҷониби мо қайд гардид, ки вазъияти имрўзаи Афғонистон ҳамоно ҳамоҳангии воқеӣ ва созандаи кишварҳои минтақа ва ҷомеаи ҷаҳониро баҳри истиқрори сулҳу субот дар ин кишвар, аз ҷумла тавассути андешидани чораҳои муассир ҷиҳати эҳёи иқтисодии он, талаб мекунад.

Дар ин замина ҷонибҳо ҳавасмандии худро ба идомаи муносибатҳои созанда дар доираи созмонҳои минтақавию байналмилалии ҳамкориҳои бисёрҷониба, аз ҷумла Созмони Милали Муттаҳид ва Созмони амният ва ҳамкорӣ дар Аврупо иброз доштанд.

Бо изҳори майл ва рағбати мутақобила ҷиҳати густариши минбаъдаи равобити гуногунҷанбаи судманд байни ҳар ду кишвар, ҷонибҳо азму иродаи худро ҷиҳати тақвияти ҳамкориҳо дар масъалаҳои татбиқи пурраи Стратегияи Иттиҳоди Аврупо барои кишварҳои Осиёи Марказӣ, мубориза алайҳи қочоқи маводи мухаддир, терроризм ва дигар таҳдиду чолишҳои асри муосир таъкид карданд.

Бо нияти идомаи пурфайзи муколамаи байни ду кишвар ман аз дўсти гиромиқадр Герсоги Бузург, Волоҳазрат Анри Албер Габриэл Феликс Мари Гийом ва Сарвазири мўҳтарами Люксембург ҷаноби Олӣ Жан-Клод Юнкер даъват кардам, ки дар вақти барояшон муносиб ба кишвари мо сафари расмӣ анҷом диҳанд.

Ташаккур.