Президенти Ҷумҳурии Тоҷикистон Ҷаноби Олӣ Эмомалӣ Раҳмон бо даъвати Президенти Федеролии Ҷумҳурии Австрия Ҷаноби Олӣ Ҳайнз Фишер аз 6 то 7-уми июни соли 2011 ба Ҷумҳурии Австрия сафари расмӣ анҷом дод. Президент Эмомалӣ Раҳмонро ҳайати баландпоя ва дигар шахсони расмӣ ҳамроҳӣ намуданд.

Президенти Ҷумҳурии Тоҷикистонро дар Австрия бо пазироии гарм истиқбол намуданд, ки он баёнгари муносибатҳои зич ва самимӣ байни Тоҷикистон ва Австрия мебошад.

Сарони давлатҳо масъалаҳои мабрут ба рушди минбаъдаи муносибатҳо байни ду кишвар, инчунин масъалаҳои минтақавӣ ва байналмилалии мавриди таваҷҷўҳи тарафайнро мавриди баррасӣ қарор доданд. Мулоқотҳо дар фазои самимӣ ва дўстона баргузор гардиданд ва баёнгари дарки муштараки масъалаҳои муҳим буданд.

Президенти Тоҷикистон ва Президенти Ҷумҳурии Австрия майл ва рағбати мутақобила ҷиҳати густариши минбаъдаи равобит ва таҳкими ҳамкории мутақобилан судманд байни ҳар ду кишварҳо, аз ҷумла дар соҳаи энергетикаи устуворро изҳор намуданд;

кўшишҳои якдигарро ҷиҳати гузаронидани машваратҳои доимии сиёсӣ байни ду давлат тасдиқ намуданд;

омодагии хешро ҷиҳати давом додани ҳамкорӣ дар чаҳорчўбаи Созмони Милали Муттаҳид ва ташкилотҳои махсусгардонидашудаи он, дигар созмонҳои байналмилалӣ ва САҲА изҳор намуданд.

Зимни сафар ҷонибҳо Созишнома оид ба канорагирӣ аз андозбандии дукаратаро ба имзо расониданд.

Ҷониби Тоҷикистон омодагии ҷониби Австрияро вобаста ба пешниҳод намудани бурсияҳо барои дипломатҳои ҷавони тоҷик (хизматчиёни давлатӣ) ҷиҳати иштирок дар курсҳои барномавии такмили ихтисос оид ба ҳамкорӣ ва Ҳамгироӣ бо Аврупо дар Академияи дипломатии Вена барои соли 2011 хуш пазируфт.

Президенти Ҷумҳурии Тоҷикистон барои пазироии гарм изҳори миннатдорӣ баён намуда, Президенти Ҷумҳурии Австрияро барои ташрифи расмӣ ба Тоҷикистон даъват намуд. Даъват бо мамнуният пазируфта шуд.



Вена, 7-уми июни соли 2011



Президенти Президенти

Ҷумҳурии Тоҷикистон Федеролии Ҷумҳурии Австрия



Эмомалӣ Раҳмон Ҳайнз Фишер



___________________________ ___________________________