Президенти ҶТ Эмомалӣ Раҳмон cафири фавқулодда ва мухтори Ҷумҳурии Озарбойҷон дар Тоҷикистон Магерам Алиевро бинобар анҷом ёфтани мӯҳлати сафириаш дар Тоҷикистон ба ҳузур пазируфт.
Душанбе, 19 май. - Магерам Алиев пас аз мулоқот бо Президенти кишвар Эмомалӣ Раҳмон андешаҳояшро ба хабарнигорони ВАО мухтасар баён намуда гуфт, ки «Ман имрӯз фаъолияти дипломатиямро дар Тоҷикистон ба охир расонидам ва ба Ватани худ бармегардам. Дар давоми фаъолияти худ дар Тоҷикистон хеле таассуроти хуб бардоштам, чун ки халқи шумо ниҳоят меҳрубон аст ва ин халқ ояндаи дурахшон дорад. Халқи Озарбойҷон кӯшиш ба харҷ медиҳад, ки муносибатҳои ин ду халқу кишвар дӯстона ва барои ҳарду ҷониб муфид бошанд. Ман дар давоми фаъолиятам кӯшидам, ки ҳамкориҳои мо чӣ дар доираи дипломатӣ ва чӣ дар доираи сиёсиву иқтисодӣ шаффоф ва муфид бошанд.
Ҳамчунин ӯ зикр намуд, ки «Дар ин самт то андозае ба муваффақият ноил гардидем ва умедворам, ки он корҳое, ки дар ин самт ба охир нарасонидем, дар оянда ҷомаи амал мепӯшанд. Халқи тоҷик медонад, ки Озарбойҷон ҳамеша тарафдори муносибатҳои бародаронаи ин ду давлат мебошад. Албатта, барои расидан ба ин ҳадафҳо вақт лозим аст ва мо умед ба он мебандем, ки ин орзуҳо ҳам дар Тоҷикистон ва ҳам дар Озарбойҷон амалӣ шаванд».
«Яке аз масъалаҳое, ки мо имрӯз бо президент мавриди баррасӣ қарор додем, ин равобити мустақим миёни ду давлат мебошад. Мо қарор додем, ки байни Душанбе ва Боку хатсайри нави ҳавоӣ кушоем, то ки робитаҳоямон боз ҳам мустаҳкам шаванд»,- гуфт дар охир Магерам Алиев.
