Душанбе, 29 апрел. - Дар ҷаласаи ҷашнӣ, ки таҳти раёсати раиси Шўро, Президенти Ҷумҳурии Тоҷикистон Эмомалӣ Раҳмон дар бўстонсарои ҳукумати кишвар баргузор гардид, аъзои Шўрои ҷамъиятии Ҷумҳурии Тоҷикистон роҳбарият ва аъзои фаъоли ҳизбу ҳаракатҳои сиёсӣ, созмонҳои ҷамъиятӣ, намояндагони воситаҳои ахбори умум ва масъулини Дастгоҳи иҷроияи Президенти Ҷумҳурии Тоҷикистон ширкат намуданд.

Раиси Шўрои ҷамъиятии Ҷумҳурии Тоҷикистон, Президенти кишвар Эмомалӣ Раҳмон бо ёдоварӣ аз фаъолияти 15 – солаи Шўро ба натиҷаи корҳои анҷомдодаи он, ба хусус дар роҳи расидан ба сулҳу салоҳ, ризоияти аҳли ҷомеа, таъмини ваҳдату ягонагӣ ва ба бунёдкорию созандагӣ равона кардани мардум, баҳои баланд дода, изҳор дошт, ки ин шўро вазифаҳои худро пурра анҷом надодааст ва корҳои зиёд ҳанўз дар пешанд.

Ба андешаи Эмомалӣ Раҳмон, Шўрои ҷамъиятии Ҷумҳурии Тоҷикистон дар тамоми равандҳои ҷомеаи муосири Тоҷикистон, аз ҷумла дар қабули қонуну қарорҳои муҳим бояд хеле фаъол бошанд, то ки дар пешгирӣ аз ҳар гуна тамоюлҳои номатлуб ва хатою ғалатҳо саҳми арзанда гузоранд.

Сарвари давлат Эмомалӣ Раҳмон аз дастовардҳои Ҳукумати Ҷумҳурии Тоҷикистон дар амалӣ намудани сиёсати иҷтимоию иқтисодӣ аз замони ба даст омадани истиқрори сулҳу ризоияти ҷомеа ёдовар шуда, аз ҷумла таъкид дошт, ки дар давоми даҳ соли охир сатҳи зиндагии мардум даҳҳо баробар боло рафтааст.

Президенти кишвар Эмомалӣ Раҳмон аз масъулияти роҳбарони мақомоти давлатӣ, ҳизбу ҳаракатҳои сиёсӣ ва созмонҳои ҷамъиятӣ доир ба ҳифзи фазои сулҳу осоиш, ваҳдати миллӣ ва тарғиби созандагию бунёдкорӣ ёдовар шуда, таъкид дошт, ки ба фаъолияти ҳар як сиёсатмадор, ҳар як шахси масъул дар қабули қарорҳои ҳаётан муҳим наслҳои оянда ва таърих баҳо хоҳад дод.

Баъди анҷоми суханронии Раиси Шўрои ҷамъятӣ, Сарвари давлат Эмомалӣ Раҳмон аъзои сершумори Шўрои ҷамъиятӣ, доир ба паҳлуҳои гуногуни ҳаёти ҷомеа ва роҳҳои таҳкими амну суботи кишвар андешаҳои ҷолиб баён доштанд. Дар муҳокимаи масоили мубрами ҷомеа, аз ҷумла Раиси ҳизби аграрии Тоҷикистон Амир Қароқулов, Раиси ҷамъияти қирғизони Тоҷикистотон Зуракан Давлаталиева, Раиси Ассотсиатсияи энергетикҳои Тоҷикистон Рафиқа Мусоева, Раиси ҷамъияти дониши Тоҷикистон Фозил Тоҳиров, Раиси Ассотсиатсияи занони маълумоти олидори Тоҷикистон Гулҷаҳон Бобосодиқова, Раиси Ассотсиатсияи олимаҳои Тоҷикистон Муҳибба Ёқубова, Раиси байналмилалии таҳкими мусиқии мардумӣ ба номи Борбад Аскаралӣ Раҷабов ва дигарон иштирок намуданд.