Президенти Ҷумҳурии Тоҷикистон Эмомалӣ Раҳмон як гурӯҳ кадрҳои дар як қатор сохторҳои давлатӣ ба вазифаҳои масъул пешниҳодшударо барои сӯҳбат ба хузур пазируфт.
Душанбе, 11 апрел. - Ҳамин тариқ, бо қарорҳои Ҳукумати Ҷумҳурии Тоҷикистон Акбар Турсунов директори Институти забон, адабиёт, шарқшиносӣ ва мероси хаттии ба номи Рӯдакии Академияи илмҳои Ҷумҳурии Тоҷикистон, Боймуҳаммад Сафаров муовини сардори Саридораи ҳифзи сирри давлатии назди Ҳукумати Ҷумҳурии Тоҷикистон ва Сӯҳроб Валимадов муовини директори Агентии стандартизатсия, метрология, сертификатсия ва нозироти савдои назди Ҳукумати Ҷумҳурии Тоҷикистон таъин шуданд.
Абдулҳамид Нозимов бо амри Президенти Ҷумҳурии Тоҷикистон мудири шӯъбаи илм ва маорифи дастгоҳи иҷроияи Президенти Ҷумҳурии Тоҷикистон таъин гардид.
Дар мувофиқа бо Президенти мамлакат Сайдамир Ҷононов директори филиали Донишгоҳи давлатии омӯзгории ба номи С.Айнӣ дар ноҳияи Рашт ва Назрулло Аминов директори институти иқтисодиёти кишоварзии Академияи илмҳои кишоварзии Тоҷикистон таъин шуданд.
Зимни сӯҳбат Сарвари давлат Эмомалӣ Раҳмон онҳоро ба заҳмати содиқонаю софдилона ба нафъи давлати Тоҷикистон ҳидоят намуда таъкид дошт, ки вазифаҳои муҳими бар дӯшашон гузошташударо бо ҳисси баланди ватандӯстӣ ва масъулиятшиносӣ иҷро намоянд.
