- зикр намуд Президенти Ҷумҳурии Тоҷикистон Эмомалӣ Раҳмон дар мулоқот бо аҳли зиёи кишвар, ки 19 марти соли ҷорӣ дар Театри опера ва балети ба номи С. Айнӣ баргузор гардид.

Душанбе, 19 март. - Ӯ афзуд, ки адабиёт дар зеҳну тафаккури афроди ҷомеа беҳтарин арзишҳои инсониро парвариш медиҳад ва дар саҳифаҳои заррини адабиёти классикии тоҷик, ки таърихи чандинҳазорсола дорад, ғояҳои олии башарият тарғибу ташвиқ гардидаанд.

“Бо дарназардошти ин нукта мо ба мероси хаттӣ ва осори гузаштаи халқамон аҳамияти ҷиддӣ медиҳем ва барои дастраси хонандагон гардонидани он пайваста кўшиш менамоем. Мисоли равшани ин тазкираи панҷоҳҷилдаи адабиёти гузашта ва имрўзаи тоҷик мебошад, ки нашри он ҳоло бомуваффақият идома доранд”, - изҳор дошт Сарвари давлат.

Мавриди зикр аст, ки адабиёт дар ҳақиқат оинаи зиндагӣ аст ва шоирону нависандагони кишвар бояд ба муҳимтарин воқеаҳо ва рўйдодҳои тақдирсози ҳаёти кишвар, бунёдкориву сохтмонҳои азими аср ва таҳаввулоту дигаргуниҳои зиндагии ҷомеаи мо ҳамовоз гашта, онҳоро дар асарҳои худ ҳақиқатнигорона тасвир намоянд.

“Мо аҳамияти илму фарҳанг ва мактабу маорифро аз рўзҳои аввали истиқлолияти давлатӣ амиқан дарк кардем ва онро самти афзалиятноки сиёсати иҷтимоии давлат қарор додем. Имрўз ҷомеаи мо ба шумо, зиёиёни мўҳтарам, ки нерўи ақлонии кишвари азизамон ва ҳомии забон, таърих ва адабу фарҳанги мо мебошед, аз ҳарвақта бештар ниёз дорад”, - идома дод Эмомалӣ Раҳмон.

Президенти кишвар ба аҳли зиёи мамлакат муроҷиат карда гуфт, ки: “Шумо метавонед бо осори илмиву адабӣ ва офаридаҳои фарҳангии худ, пеш аз ҳама дар талқини моҳият ва аҳамияти истиқлоли давлатӣ, соҳибихтиёриву озодӣ дар зеҳну шуури мардум, аз ҷумла ҷавонон, инчунин, ба ҷо овардани шукронаи ин неъмати худодод, ҳифзи дастовардҳои он ва таҳкиму тақвияти минбаъдаи ваҳдати миллӣ нақши бузургро адо намоед.Бовар дорам, ки тафаккури илмӣ ва фарҳангии шумо ҷомеаро ҳарчи бештар ба сўи созандагӣ ва бунёдкорӣ ҳидоят менамояд ва шумо манфиатҳои миллат ва давлати соҳибистиқлоли худро аз ҳамаи манфиатҳои дигар ҳамеша волотар медонед”.