Субҳи имрӯз Президенти Ҷумҳурии Тоҷикистон Эмомалӣ Раҳмон аз Сафири фавқулодда ва мухтори мамлакати Арабистони Саудӣ дар Тоҷикистон Бандар Муҳаммад Ҷамил Аҳмад Маҳмуд эътимоднома қабул намуд.
Душанбе, 24 январ. - Пас аз мулоқот Бандар Муҳаммад Ҷамил Аҳмад Маҳмуд андешаҳояшро мухтасар ба хабарнигорон иброз намуда гуфт, ки имрӯз ман шарафёб шудам эътимодномаро ба Ҷаноби Олӣ мӯҳтарам Эмомалӣ Раҳмон супорам ва паёми шоҳи Арабистонро ба эшон расонам. Сӯҳбати мо хеле тулонӣ буда, он асосан ба ҳамкориҳои дуҷониба миёни Тоҷикистону Арабистони Саудӣ бахшида шуд.
Сафир зикр намуд, ки албатта ҳамкориҳо ва муносибатҳои Арабистони Саудӣ бо Тоҷикистон нав нестанд ва умед аст, ки тавассути кӯшишҳои мо ва Ҳукумати Ҷумҳурӣ ҳамкориҳои дуҷониба рушду густариш меёбанд.
Ба назари ман алоқа ва иртиботи исломии муштараки ин ду кишвар муҳимтарин самтҳои ҳамкорӣ арзёбӣ мегарданд. Дар ояндаи наздик имкон ҳаст, ки сармоягузорӣ дар ҳамаи соҳаҳо сурат гирад.
