Муаллиф: Аваз Юлдошев

Душанбе. 15-уми июн. ОИ «Азия- Дар шаҳри Маскав президенти Тоҷикистон Эмомалӣ Раҳмон дар нишасти сарони кишварҳои узви Созмони паймони амнияти дастаҷамъӣ ширкат варзид. Дар ин бора аз хадамоти матбуоти сарвари давлат хабар доданд.

Тибқи иттилои интишоргардида, дар нишаст сарони кишварҳои Арманистон, Қазоқистон, Қирғизистон, Русия ва Тоҷикистон Созишнома дар бораи таъсиси нерӯҳои муштараки зудамали созмонро ба имзо расониданд.

Белорус ва Ӯзбекистон аз имзои созишномаи мазкур худдорӣ намуданд. Тибқи иттилои хабаргузориҳои Русия, иллати зери созишнома имзо нагузоштани ҳайати Белорус манъи маҳсулоти ширии ин кишвар ба Русия арзёбӣ мешавад. Ба гуфтаи президенти Русия Дмитрий Медведев, Ӯзбекистон як қатор муқаррароти созишномаро зери шубҳа гузошта, аз имзои созишнома даст кашидааст.

Тибқи иттилои хадамоти матбуоти президенти Тоҷикистон, дар ин сафар Эмомалӣ Раҳмонро Вазири корҳои хориҷии мамлакат Ҳамрохон Зарифӣ, Мушовири давлатии Президенти Ҷумҳурии Тоҷикистон оид ба сиёсати хориҷӣ Эркин Раҳматуллоев, Котиби Шӯрои амният Амирқул Азимов, Вазири мудофиа Шералӣ Хайруллоев, Раиси Кумитаи давлатии амнияти миллӣ Хайриддин Абдураҳимов ва дигар шахсони расмӣ ҳамроҳӣ менамоянд.

Мувофиқи ахбори оҷонсиҳои иттилооти Русия, шоми дирӯз президенти Тоҷикистон Эмомалӣ Раҳмон ҷиҳати ширкат дар нишасти сарони кишварҳои узви Созмони Ҳамкории Шанхай озими шаҳри Екатеринбург шуд.