Душанбе, 4 октябр. (ТВ «Сафина», М. Зокиров). – Дар ноҳияи Ҳисор Президенти Ҷумҳурии Тоҷикистон Эмомалӣ Раҳмон нахуст бо буридани лентаи рамзӣ ба фаъолияти як корхонаи азими ресандагӣ оғоз бахшид.

Бояд гуфт, ки ин корхона бо ҷалби соҳибкорони дохилӣ ва сармояи хориҷӣ бунёд шуда, дар марҳилаи аввал 202 нафарро бо ҷои корӣ доимӣ ва маоши хуб таъмин менамояд. Дар ҳамин марҳила иқтидори истеҳсолии корхона дар як сол коркарди 4 ҳазор тонна нахи пахтаро ташкил медиҳад. Таҷҳизоту дастгоҳҳои истеҳсолӣ аз давлати Италия ворид шуда, дар шароити замони муосир навтарин ҳисобида мешавад. Ҳамзамон чанд нафар мутахассисони Итолиёвӣ барои омўзиши мутахассисони маҳаллӣ ба коргоҳ даъват шуданд.

Президенти Ҷумҳурии Тоҷикистон Эмомалӣ Раҳмон бо ҷараёни истеҳсоли маҳсулот дар ин корхона аз наздик шинос шуда, барои ба роҳ мондани фаъолияти пурсамар ба масъулин дастуру супоришҳои мушаххас дод. Мутобиқи фармоиши мизоҷон корхонаи мазкур имкон дорад, ки даҳҳо адад номгўи маҳсулоти ресандагӣ, аз ҷумла риштаро ба роҳ монад. Дар ҳамин ҷо ҳамчунин роҳбари давлат Эмомалӣ Раҳмон санги асос ва нома ба наслҳои ояндаро барои бунёди як корхонаи рангуборкунии матоъ гузошт.

Иттилоъ дода шуд, ки дар давоми 2 соли бунёди ин корхона бештар аз 200 нафар мутахассисони маҳаллӣ бо корҳои сохтмонӣ ҷалб мешаванд ва баъди мавриди истифода қарор гирифтанаш теъдоди умумии коргарони ин корхона бештар аз 520 нафарро ташкил хоҳад дод. Дар шафати корхонаи ресандагӣ ҳамчунин барои бунёди филиали донишкадаи технологии Тоҷикистон санги асос гузошта шуд. Ин муассисаи таълимӣ бо мақсади омода сохтани мутахассисони соҳибтаҷриба барои корхонаи ресандагӣ ва дигар коргоњњои саноатие, ки дар водии Ҳисор дар оянда сохта мешаванд, бунёд карда хоҳад шуд.
Зимни сафар Президенти Ҷумҳурии Тоҷикистон Эмомалӣ Раҳмон ҳамчунин ба бунёди як корхонаи саноатии дигар – коргоҳи дузандагӣ асос гузошт. Дар ҳамин ҷо Президенти Чумҳурии Тоҷикистон Эмомалӣ Раҳмон бо мардуми ноҳияи Ҳисор мулоқоти озоду самимӣ доир намуда, ба суолҳои сершумори онҳо посух дод.