Душанбе, 22 сентябр. (ТВ «Сафина», М. Зокиров). - Нахуст Сарвари давлат ба ноҳияи Қубодиён рафта, дар ин ҷо ба фаъолияти як коргоҳи бузурги коркарди решаи ширинбўя оғоз бахшид. Ин корхонаи муштарак аз ҷониби Тоҷикистону Ҷопон сохта шудааст. Иқтидори истеҳсолии корхона коркарди 3 ҳазор тонна решаи хушки ширинбўя дар яксол буда, аз маҳсулоти истеҳсолӣ маводи гилитсепрезин ва дигар маҳсулоти косметологӣ истеҳсол карда мешавад.
Корхонаи муштаракро Ҷамъияти дорои Масъулияташ Маҳдуди «Аввалин» бо харҳи наздик ба 3 миллион доллар бунёд кардааст. Лозим ба таъкид аст, ки дар ин муассисаи истеҳсолӣ танҳо коркарди аввалияи решаи ширинбўя ба роҳ монда шуда, истеҳсоли маҳсулоти ниҳоӣ дар хориҷи кишвар сурат мегирад. Вобаста ба ин Роҳбари давлат Эмомалӣ Раҳмон ба масъулин дастури қатъӣ дод, ки дар 1,5 соли оянда истеҳсоли пурраи маҳсулотро дар дохили корхона ба роҳ монанд. Ҳамчунин ба ҳукумати маҳалл супориш дода шуд, ки барои ташкил кардани хоҷагии ёрирасон ба корхона 573 гектар замин ҷудо намояд. Маҷмўан дар ин ҷо 50 нафар мутахассис бо ҷойи кори доимӣ ва 150 каси дигар бо корҳои мавсимӣ фаро гирифта мешаванд.
Дар ноҳияи Қубодиён Эмомалӣ Раҳмон ҳамчунин аз хоҷагии деҳқонии «Давлатбек» дидан кард. Тавре маълум шуд, ин хоҷагӣ 52 гектар замин дошта, аз нигоҳи маҳсулнокии заҳмат яке аз хоҷагиҳои пешқадами ноҳия ба ҳисоб меравад. Ҳосили аз зироати аввал гирифтаи хоҷагидорон нишондиҳандаи беҳтарин дар ноҳия буда, масъалаи кишти такрории зироат низ дар ин ҷо ба таври лозим ба роҳ монда шудааст. Дар кишти дуюм деҳқонони хоҷагӣ дар 14 гектар шолӣ кишт намуда, ҳосили интизориашон 40-45 сентнерро ташкил медиҳад. Вобаста ба вазъи кунунии ҷомеаи ҷаҳонӣ дар самти таъмини амнияти ғизоӣ Президенти Ҷумҳурии Тоҷикистон Эмомалӣ Раҳмон ба хоҷагидорон барои истифодаи боз ҳам беҳтару самараноки замин маслиҳатҳои муфид дод.

Аз ноҳияи Қубодиён Роҳбари давлат Эмомалӣ Раҳмон ба ноҳияи Ҷалолиддини Румӣ ташриф овард. Дар хоҷагии тухмипарварии ба номи Сафар Ҷумъаев нахуст Эмомалӣ Раҳмон бо рафти ҷамъоварии пахта ва ҷараёни кишту парвариши дигар анвои зироати хоҷагии қишлоқ шинос шуд. Тавре маълум гардид, то кунун дар ин хоҷагӣ бештар аз 2 ҳазору 100 тонна пахтаи хушсифат ҷамъоварӣ шуда, ин маъракаи муҳим айни ҳол бо суръати баланд идома дорад. Эмомалӣ Раҳмон ба роҳбарияти хоҷагӣ дастур дод, ки барои саривақт ва беталаф ҷамъоварӣ кардани ҳосили мавҷуда қабл аз ҳама ба омилҳои ҳавасмандии чинакчиён, аз ҷумла пардохти саривақтии маблағи чинак ва таъмини онҳо бо хўрок аҳамияти ҷиддӣ зоҳир намоянд. Дар ҳамин ҷо ҳамчунин намоиши маҳсулоти истеҳсолии хоҷагӣ ташкил карда шуда буд, ки аз он низ Роҳбари давлати Тоҷикистон дидан намуд. Беҳтар намудани тухмии зироатҳои гуногуни хоҷагии қишлоқ ва дар ҳамин бастагӣ таъмин кардани хоҷагиҳои ноҳияву вилоят бо тухмиҳои хушсифат аз масъалаҳоест, ки масъулини сохторҳои давлатии маҳаллӣ ва ҷумҳуриявӣ дар оянда бояд ба он аҳамияти бештар диҳанд, таъкид намуд Эмомалӣ Раҳмон.
Дар ноҳияи Ҷалолиддини Румӣ Президенти Ҷумҳурии Тоҷикистон Эмомалӣ Раҳмон ҳамчунин бо ҷараёни корҳои бунёдӣ дар марҳилаи сеюми роҳи автомобилгарди Душанбе-Қўрғонтеппа-Дўстӣ-Панҳи поён аз наздик шинос шуд. Дар марҳилаи сеюми бунёди ин роҳ таъмиру таҷдиди 42 километр роҳи байни Дўстӣ –Панҷи поён ба нақшагирийфта шуда, корҳои сохтмониро дар ин ҷода ширкати ҷопонии Дайн Нипон-Нипо анҷом медиҳад. Барои дар мўҳлати муайяншуда ва бо сифати баланд анҷом додани корҳои сохтмонӣ бештар аз 180 техникаи пуриқтидори соҳавӣ ва 180 нафар коргару мутахассиси маҳаллию хориҷӣ ба сохтмон ҷалб шудаанд. Тавре роҳсозон ба Роҳбари давлат Эмомалӣ Раҳмон иттилоъ доданд, аз ҳаҷми умумии роҳи дарнақшабуда чил километраш аз таъмири хушсифат бароварда шудааст ва дар 2 километр роҳи боқимонда корҳои асосӣ то моҳи октябр ба анҷом расонида мешавад.
Бояд зикр намуд, ки роҳи автомобилгарди Душанбе-Қўрғонтеппа-Дўстӣ-Панҷи поён яке аз шоҳроҳҳои муҳим дар системаи нақлиётии Тоҷикистон буда, аҳамияти бузурги ҷумҳуриявию минтақавӣ дорад. Пурра мавриди истифода қарор гирифтани ин роҳ қадами устуворе дар самти раҳоии кишвар аз бунбасти коммуникатсионӣ хоҳад буд.