Душанбе, 5 май. - Зимни сӯҳбат масъалаҳои муносиботи дуҷонибаи миёни Тоҷикистону Покистон мавриди муҳокима қарор гирифтанд. Сафир оид ба ин мавзӯъ гуфт, ки ҳамкориҳои Тоҷикистону Покистон дар соҳаҳои гуногун тадриҷан инкишоф меёбанд. Сафари давлатии Президенти Тоҷикистон ба Покистон дар моҳи марти соли 2011 ба густариши муносибатҳои ду кишвар такони тоза бахшид.

Мир Чингиз Хон Ҷамолӣ дар навбати худ гуфт, ки ҷониби Покистон нияти барқарор сохтани иртибот ва минбаъд тавсеа додани ҳамкориҳои мутақобилан судмандро бо вазорату идораҳо ва сохторҳои гуногуни Тоҷикистон дорад. Ба ақидаи вай бояд дар кӯтоҳтарин фурсат лоиҳаи созишномаи ҳамкории миёни ду кишвар дар бахши илму технология омода гардида пешниҳод шавад. Вазир афзуд, ки инкишофи муносибатҳо дар соҳаи мазкур хеле муҳиму манфиатнок маҳсуб мегарданд, хусусан ҳамкориҳо дар соҳаи илму технологияи муосир, табодули таҷриба ва дастовардҳои навини олимону донишмандон ва донишҷӯён заруранд. Ӯ инчунин таъкид намуд, ки дар Покистон 16 пажӯҳишгоҳи илмӣ фаъолият дорад, ки ҳар кадом метавонад дар соҳаи худ бо муассисаҳои илмии Тоҷикистон иртибот дошта бошад ва ҳамкориҳои муфидро ба роҳ монад. Ҳамсӯҳбат ташкил намудани сафари ҳайатҳои кориро дар самти мазкур ба кишварҳои якдигар муҳим донист.

Дар идомаи сӯҳбат масъалаи ҳамкориҳои Тоҷикистону Покистон дар соҳаи энергетика, аз ҷумла амалӣ шудани барномаи CASA – 1000 баррасӣ гардид. Мир Чингиз Хон Ҷамолӣ иброз дошт, ки Покистон ба нерӯи барқи Тоҷикистон ниёз дорад. Аз ин рӯ, барои амалӣ гардидани барномаи мазкур ҳамаҷониба кӯшиш менамояд.