Дар факултаи молиявию иқтисодии Донишгоҳи миллии Тоҷикистон дар мавзӯи «20 соли Истиқлолият: дастовардҳо ва дурнамо» конфронси илмӣ - назариявии ҷумҳуриявӣ баргузор гардид.
Душанбе, 22 июн. - Дар кори конфронс иштирокчиён масъалаҳои рушди иқтисодӣ - иҷтимоӣ ва пешрафти соҳаҳои алоҳидаро мавриди таҳлилу баррасӣ қарор доданд.
Таъкид гардид, ки Ҷумҳурии Тоҷикистон дар заминаи се ҳадафи стратегӣ - расидан ба истиқлолияти энергетикӣ, баромадан аз бунбасти коммуникатсионӣ ва таъмини амнияти озӯқаворӣ ба пешравиҳои назаррас ноил гардида, рӯз то рӯз иқтисодиёти кишвар рушд меёбад.
Дар Ҷумҳурии Тоҷикистон давоми 20 соли соҳибистиқлолӣ чандин корхонаҳои хурду бузурги истеҳсолӣ сохта ба истифода дода шуд, ки дар рушди иқтисодиёт заминаҳои мусоидро фароҳам овард.
Муҳокимаи рушди бахши туризм дар мамлакат низ аз масъалаҳои кори конфронс буд. Зикр шуд, ки барои рушди соҳа ва бо ин васила мусоидат ба пешрафти иқтисодиёт, бояд дар тамоми мавзеъҳои сайёҳӣ шароит ва хизматрасониҳо ҷавобгӯ ба талаботи стандартҳои байналмилалӣ ба роҳ монда шавад.
