Бо мақсади ҷалби довталабони арзанда ба Донишкадаи иқтисодии Тоҷикистон ректори Донишкадаи мазкур Нозимҷон Нидоев ба ноҳияҳои дурдасту кӯҳистони шарқи Тоҷикистон-Ҷиргатолу Тоҷикобод сафари хидматӣ анҷом дод.
Душанбе, 21 июн. - Зимни сафар ба ин ноҳияҳои дурдаст ректори Донишкадаи иқтисодии Тоҷикистон бо роҳбарияти мақомоти иҷроияи ҳокимияти давлатии ноҳияҳои Тоҷикободу Ҷиргатол, мудирони шӯъбаҳои маориф ва хатмкунандагони мактабҳои таҳсилоти умумии ин ноҳияҳо сӯҳбату мулоқот анҷом дода, доир ба шароити таҳсил ва нақши Донишкадаи иқтисодии Тоҷикистон дар омода намудани мутахассиони ботаҷриба табодули назар кард. Мавсуф афзуд, ки дар донишкада, ки яке аз марказҳои бузурги омода намудани мутахассисони барои ҷумҳурӣ муҳим ба шумор меравад, барои таҳсил тамоми шароиту имкониятҳои илмию фаннӣ ва базаи моддию техникӣ муҳаё шудааст. Аз ин рӯ, аз хатмкунандагони мактабҳои таҳсилоти умумии ин ноҳияҳо даъват ба амал овард, ки мувофиқи хоҳишу шароиташон имкон доранд дар дилхоҳ факултаи донишкада шомил шуда, таҳсилро идома диҳанд.
Бояд зикр кард, ки Донишкадаи иқтисодии Тоҷикистон, ки 15 сол муқаддам таъсис дода шудааст, алҳол дорои 4 факулта буда, беш аз 5 ҳазор донишҷӯён аз рӯи 22 ихтисос дар он ба таҳсил фаро гирифта шудаанд.
