Айни замон ҳалли масоили дар Тоҷикистон кушодани филиали ду мактаби олии россиягӣ дар марҳилаи ба итмомрасӣ қарор дорад.
Душанбе, 13 май. - Қарор аст, ки дар кишвари мо филиали яке аз мактабҳои олии бузургтарини омӯзишӣ ва илмӣ дар соҳаи металлургия- Донишкадаи оҳан ва хӯлаи Маскав ва яке аз бузургтарин маркази омӯзишӣ ва илмӣ-татқиқотӣ дар соҳаи энергетика ва электромеханика-Донишкадаи энергетикии Маскав кушода шаванд.
Тавре сардори раёсати муносибатҳои байналмилалии Вазорати маорифи ҶТ Тазарв Насимова иттилоъ дод, дар назар аст, ки созишномаи байниҳамдигарӣ миёни Вазорати маорифи Тоҷикистон ва Вазорати маориф ва илми ФР миёнаҳои моҳи июни соли ҷорӣ дар шаҳри Маскав ба имзо расад.
Ҳамчунин аз 16 то 18-уми июни соли ҷорӣ дар шаҳри Душанбе ҷаласаи 18-уми Шӯро оид ба ҳамкориҳо дар соҳаи маориф ва конференсияи вазирони маорифи кишварҳои ИДМ, инчунин семинар-тренинг дар мавзӯи «Омоданамоии мутахассисон ва кадрҳои илмии марҳилаи нав дар соҳаи рушди инноватсионӣ» барои кишварҳои аъзои ИДМ баргузор мегардад.
Чорабиниҳо зери сарпарастии Фонди байнидавлатии ҳамкориҳои башардӯстона мегузаранд.
«Ғайр аз ин айни замон маъракаи ташкил ва гузаронидани имтиҳоноти дохилшавӣ ба мактабҳои олии ФР дар чаҳорчӯби квотаҳои аз ҷониби Вазорати маорифи ҶТ пешниҳодшуда оғоз ёфтааст»,-гуфт дар хотима Т. Насимова.
