Дар шаҳри Измири давлати Туркия V-умин ҷашнвораи донишҷӯёни тоҷике, ки дар ин кишвар таҳсил менамоянд, ба кори худ анҷом.
Измир, 5 май. - Дар чорабинии мазкур, ки онро сафорати Ҷумҳурии Тоҷикистон дар Ҷумҳурии Туркия ташкил намуд, 150 нафар донишҷӯи тоҷик, ки дар макотиби олии ин кишвар, бахусус дар шаҳрҳои Анқара, Истанбул, Бурса, Қайсарӣ, Қуния ва Измир таҳсил менамоянд, иштирок намуданд.
Сафири ҶТ дар Туркия Фаррух Шарипов ба ҷониби Туркия барои дастгирӣ ва ташкили чунин чорабинӣ изҳори миннатдорӣ намуд. Ӯ зикр намуд, ки гузаронидани ҷашнвораи донишҷӯёни тоҷик, ки муҳассилини ин кишваранд, ба ҳукми анъана даромадааст. Ҷашнвораи мазкур ба 20-солагии Истиқлолияти Ҷумҳурии Тоҷикистон бахшида шуда буд.
Баъд аз маросими расмӣ аз рӯи 6 намуди варзиш-футбол, баскетбол, волейбол, тенниси рӯи миз, гӯштингирӣ ва шоҳмот мусобиқаи варзишӣ оғоз гардид. Аз ҳама бештар дастаи донишҷӯёни шаҳрҳои Анқара ва Истанбул мукофот ба даст оварданд. Ғолибоне, ки ҷойҳои муайянро ба даст оварданд, бо медалу мукофоти хотиравӣ қадр гардиданд.
Тавре раиси шӯрои донишҷӯён Беҳрӯз Нуров иброз намуд, айни ҳол дар тамоми қаламрави Туркия 210 нафар донишҷӯи тоҷик таҳсил менамоянд. Ҳамчунин ӯ зикр намуд, ки тӯли ин муддат донишҷӯён шумораи аввали журнали донишҷӯёнро таҳти унвони «Ватан» аз чоп бароварданд. Донишҷӯён дар якҷоягӣ бо сафорати ҶТ дар Туркия Рӯзи забони тоҷикӣ, Рӯзи Сарқонуни ҶТ, шабҳои эҷодӣ бахшида ба 100-солагии шоирони тоҷик Боқӣ Раҳимзода ва Мирзо Турсунзода ва ҷашни байналмилалии Наврӯзро таҷлил намуданд.
