Моҳи сентябри соли ҷорӣ хишти аввали бинои 5- ошёнаи Донишгоҳи славянии Тоҷикистону Россия (ДСТР) гузошта мешавад.
Душанбе, 21 апрел. - Он дар назди бинои асосии ин донишгоҳ ҷойгир мегардад.
Дар ин бора 19 апрел ректори ДСТР Муҳаммадюсуф Имомов зимни нишаст ба хабарнигорон иттилоъ дод. Ӯ зикр намуд, ки бино мувофиқи талаботи байналмилалӣ сохта мешавад. Дар он утоқҳо ва кафедраҳои омӯзишӣ, озмоишгоҳҳои илмӣ-тадқиқотӣ, толорҳои варзишӣ ва маҷлисгоҳ, маркази фарҳангӣ, китобхона ва ошхона ҷойгир мешаванд.
Дар маҷмӯъ, дар бинои нави донишгоҳи мазкур шароити мусоид барои таҳсил ва гузаронидани чорабиниҳои гуногун фароҳам оварда мешавад.
Майдони умумии бино 20 ҳазору 629 метри мураббаъро фаро мегирад. Лоиҳаро Дирексияи сохтмони Дастгоҳи иҷроияи Президенти ҶТ баррасӣ намудааст. Маблағи умумии корҳои сохтмонӣ аз ҳисоби Ҳукумати кишвар ва донишгоҳ қариб 30 млн. сомониро ташкил медиҳад.
