Дар вохӯрии раиси ВМКБ Қодири Қосим бо варзишгарон зикр гардид, ки соли 2010 варзишгарони вилоят нисбат ба солҳои пешин бештар ба комёбӣ соҳиб шуданд.
Хоруғ, 1 феврал. - Онҳо дар мусобиқаҳо ширкат варзида, 85 медал гирифтанд, ки 29 – тоаш тилло, 20-тоаш нуқра ва 6-тои дигараш биринҷианд ва ин нисбат ба соли 2009 20 адад зиёд аст.
Ба хотири рушди варзиш танҳо барои шаҳри Хоруғу ноҳияи Роштқалъа аз ҳисоби буҷа 300 миллион сомонӣ ҷудо гардид. Дар шаҳри Хоруғ, навоҳии Дарвоз, Мурғоб, Роштқалъа, Рӯшон ва Ишкошим варзишгоҳҳои барҳаво сохта шуданд. Бунёди варзишгоҳи замонавӣ барои 5000 ҷой дар ноҳияи Ванҷ идома дорад.
Тавре раиси вилоят хабар дод, имсол дар вилоят соли варзиш эълон гардидааст. Дар вилоят Барномаи рушди варзиш таҳия гардидааст, ки тибқи он барои рушди варзиш корҳои назаррас анҷом дода мешаванд. Дар назди ҳар як деҳаю маҳаллаҳои шаҳр майдончаҳои варзишӣ бунёд мегарданд. Дар шаҳри Хоруғ бунёди Қасри варзиш ва дар маркази кулли навоҳӣ бунёди варзишгоҳҳои замонавӣ ба нақша гирифта шудаанд. Соли таҳсили 2011 – 2012 дар донишгоҳи давлатии ба номи Моёшоҳ Назаршоеви шаҳри Хоруғ факултаи тарбияи ҷисмонӣ кушода мешавад.
