ДМТ ба донишҷӯён ихтисосҳои навро ёд медиҳад
22 июл 2011 | Хонданд: 422 нафар | Маориф
Соли нави таҳсили 2011 – 2012 дар факултаҳои «Физика», «Механикаю математика» ва «Филология» - и Донишгоҳи миллии Тоҷикистон мутахассисони касбӣ аз рӯи ихтисосҳои нави ҳавошиносӣ,
амнияти компютерӣ ва тарҷумонҳо аз забонҳои англисӣ, фаронсавӣ ва немисӣ ба забони тоҷикӣ тайёр карда мешаванд.
Душанбе, 22 июл. - Проректори бахши таълиму усулшиносии ДМТ Раҳматулло Мирбобоев дар нишасти матбуотӣ аз ин хусус иттилоъ дод.
Соли 2010 дар донишгоҳи мазкур ба забони давлатӣ аз рӯи фанҳои табиатшиносӣ ва ҳуқуқу сиёсатшиносӣ беш аз 37 китоби дарсӣ дарҷ гардид. Ғайр аз ин худи муаллимони Донишгоҳи миллии Тоҷикистон ва донишкадаҳои дигари олӣ 42 китоби дарсиро ба табъ расониданд.
Мутаассифона, вақтҳои охир, сарфи назар аз мавҷуд будани созишномаҳои дуҷонибаи байни ДМТ ва як қатор донишкадаҳои олии Федератсияи Русия, теъдоди китобҳои дарсии аз Русия ба кишвар фиристодашаванда кам шуда истодааст.
