Сатҳи зиндагии аҳолӣ аз рӯи даромад, ки дар моҳҳои январ – майи соли ҷорӣ ба ҳисоб гирифта шудааст, нисбат ба ҳамин давраи соли гузашта 19 фоиз боло рафтааст.
Душанбе, 30 июн. - Тибқи маълумоти Агентии омори назди Президенти ҶТ, агар даромади пулии аҳолӣ аз рӯи маълумоти пешакӣ 4 млрд. 709,6 млн. сомониро дар бар гирифта бошад, хароҷоти пулӣ ва амонатҳои аҳолӣ 5 млрд. 16 млн. сомониро ташкил дод.
Музди миёнаи ҳарморҳаи номиналии кор, ки ба кормандони кироякор пардохт карда шудааст 434 сомонӣ буда, нисбат ба ҳамин давраи соли 2010-ум 25,8 фоиз зиёд мебошад.
Музди кори камтарин дар бахши фаъолияти иқтисодӣ, аз ҷумла дар соҳаи кишоварзӣ ва ҷангалпарварӣ 129 сомонӣ ва дар соҳаи моҳипарварӣ бошад, 260 сомониро ташкил медиҳад.
Музди кори аз ҳама баланд дар соҳаи сохтмон 1129 сомонӣ, дар соҳаи саноати истихроҷи маъданҳои кӯҳӣ 812 сомонӣ ва дар соҳаи барқ, газ ва таъмини об 765 сомонӣ ба ҳисоб гирифта шудааст.
