Бо мақсади баланд бардоштани самаранокии назорати молиявӣ дар ҷумҳурӣ Палатаи ҳисоби Ҷумҳурии Тоҷикистон таъсис дода мешавад.
Душанбе, 1 июн. - Дар робита ба ин 1 июни соли 2011 вакилони Маҷлиси намояндагони Маҷлиси Олии Ҷумҳурии Тоҷикистон лоиҳаи қонуни нав «Дар бораи Палатаи ҳисоби Ҷумҳурии Тоҷикистон»-ро баррасӣ ва қабул карданд.
«Мақсади таҳия ва қабули қонуни мазкур муайян намудани вазъи ҳуқуқӣ, ваколат, сохтори ташкилӣ, вазифа, ҳуқуқ ва ӯҳдадориҳои Палатаи ҳисоби Ҷумҳурии Тоҷикистон аст», гуфт зимни ташреҳи лоиҳаи ин қонун Ҷамшед Норинов, муовини вазири молияи ҷумҳурӣ. Тибқи лоиҳаи қонуни мазкур Палатаи ҳисоби Ҷумҳурии Тоҷикистон мақоми олии назорати молиявии Ҷумҳурии Тоҷикистон буда, ваколати он вобаста ба гузаронидани аудити мустақил ба тамоми шохаҳои ҳокимияти давлатии Ҷумҳурии Тоҷикистон паҳн мегардад. Палатаи ҳисоб ва аудити мустақими беруна оид ба баҳодиҳии буҷети давлатиро анҷом дода, пешниҳодҳоро ҷиҳати такмили он омода месозад ва тибқи тартиби муқаррарнамудаи қонунгузории Ҷумҳурии Тоҷикистон ба мақомоти дахлдор пешниҳод менамояд.
Бояд тазаккур дод, ки Палатаи ҳисоби Ҷумҳурии Тоҷикистон дар татбиқи сиёсати Ҳукумати Ҷумҳурии Тоҷикистон дар соҳаи молияи давлатӣ истифодабарии моликияти давлатиро арзёбӣ намуда, аз рӯи натиҷаҳои он хулосаҳои худро пешниҳод менамояд. Мақоми олии назорати молиявӣ вазифаи аудити берунаро иҷро намуда, ҳамчун вазифаҳои омӯзиш ва таҳлили самаранокии иҷрои қисми даромад, хароҷоти буҷети давлатӣ, фондҳои ғайрибуҷетӣ дар сатҳи ҷумҳуриявӣ ва маҳаллӣ, хусусан барномаҳои инвеститсионӣ ва истифодаи самараноки амволи давлатиро ба зимма дорад.
Дар мавриди таъсиси ин мақоми олии назорати молиявӣ баъзе ваколату вазифаҳои Агентии давлатии назорати молиявӣ ва мубориза бо коррупсия ба ӯҳдаи Палатаи ҳисоб вогузор мегардад. Тибқи ин қонун сараудитори Палата бо пешниҳоди Президенти ҷумҳурӣ ва парлумони мамлакат ба мӯҳлати 7 сол таъин карда мешавад. Сараудитор ҳуқуқи 2 мӯҳлат интихоб шудан дар ин вазифаро надорад.
Қабули қонуни мазкур қадами устуворест дар татбиқи ислоҳоти системаи назорати давлатии молиявӣ ва мубориза бар зидди истифодаи ғайришаффофи маблағҳои буҷетӣ дар идораҳои давлатӣ.
Ба андешаи Ҷамшед Норинов бо қабули қонуни мазкур аз сӯи парлумони мамлакат Ҷумҳурии Тоҷикистон узви Созмони байналмилалии мақомоти олии аудити молиявӣ мегардад.
