«Гардиши савдои хориҷии Ҷумҳурии Тоҷикистон нисбат ба семоҳаи аввали соли гузашта 45 фоиз афзуд, ки ин назаррас мебошад»,
- иттилоъ дод дар нишасти матбуотӣ 25 апрел вазири молияи Ҷумҳурии Тоҷикистон Сафаралӣ Наҷмиддинов.
Душанбе, 25 апрел. - Вай афзуд, ки соли 2010 дар ҳамин давра даромади буҷети давлатӣ таъмин нагардида буд. Дар семоҳаи аввали соли ҷорӣ бо афзудани гардиши савдои хориҷӣ ва маҷмӯи маҳсулоти дохилӣ даромади буҷет таъмин гардид.
Мавриди зикр аст, ки иҷрои даромади буҷети ҷумҳуриявӣ дар давраи ҳисоботӣ 105,7 фоизи нақшаро ташкил дода, ба буҷет 888 миллион сомонӣ маблағ ворид гардид, ки ин нишондод нисбат ба нақша 48 миллион сомонӣ ва нисбат ба ҳамин давраи соли гузашта 324 миллион сомонӣ зиёд мебошад.
Қисми даромади буҷети маҳаллӣ аз ҳисоби сарчашмаҳои дохилӣ ба андозаи 111 фоиз иҷро гардида, ба буҷет 421 миллион сомонӣ ворид шуд, ки аз нақшаи пешбинишуда 42 миллион сомонӣ ва нисбат ба ҳамин давраи соли сипаришуда 97 миллион сомонӣ зиёд мебошад.
