Душанбе, 18 феврал. - Дар гузориш оид ба пешгирии сиёсати барғалати манъи содироти ғалла аз ҷониби баъзе давлатҳои истеҳсолкунандаи гандум, ки боиси боло рафтани арзиши хӯрокворӣ ва бӯҳрон мегардад, иттилоъ дода мешавад.
Бино ба гузориши Бонки Ҷаҳонӣ, агар вазъ тағйир наёбад, дар соли ҷорӣ нархи маводи ғизоӣ дар саросари олам ба андозаи 29 фоиз боло хоҳад рафт.
Тибқи гузориши Бонки Ҷаҳонӣ, дар давоми 6 моҳи охири соли 2010 нархи гандум дар Қирғизистон 54 фоиз, Тоҷикистон -37, Афғонистон – 19 ва дар Покистон 16 фоиз боло рафтааст.
Ин ташкилоти бонуфуз (Бонки Ҷаҳонӣ) аз ҷомеаи ҷаҳонӣ хостааст, ки ба кишварҳое, ки ба камбуди шадиди ғизо мувоҷеҳ мебошанд, аз ҷумла ба Ҷумҳурии Исломии Афғонистон, Ҷумҳурии Демократии Конго, Ҷумҳурии Қирғизистон ва Ҷумҳурии Муғулистон кӯмаки ғизоӣ расонанд.
Ҷумҳурии Тоҷикистон бо сабаби истеҳсоли кофии ғалла дар соли 2010 ва доштани захираи орду гандум талаботашро ба воридоти орду гандум кам кард.
Тибқи маълумоти Агентии омори назди Президенти ҶТ дар моҳи январи соли ҷорӣ Ҷумҳурии Тоҷикистон аз хориҷи кишвар ҳамагӣ 27 ҳазору 900 тонна гандум ва 27 ҳазору 500 тонна орд ворид намудааст.