Тайи нӯҳ моҳи соли равон маблағи пардохти нафақаю мададпулӣ дар Тоҷикистон беш аз 601 миллиону 900 ҳазор сомониро ташкил дод.
Душанбе, 19 октябр. - Мувофиқи маълумоти Агентии омори назди Президенти Ҷумҳурии Тоҷикистон маблағи ҷудонамудаи агентии давлатӣ оид ба бимаи иҷтимоӣ ва нафақаҳои Вазорати меҳнат ва ҳифзи иҷтимоии аҳолии мамлакат дар давраи ҳисобот бо назардошти бақияи оғози сол беш аз 593 миллиону 100 ҳазор сомониро ташкил додааст.
Теъдоди нафақагирон то якуми октябри соли равон 547 ҳазору 426 нафарро (бидуни теъдоди нафақагирони фаъол) ташкил дод.
Президенти Тоҷикистон Эмомалӣ Раҳмон дар аввали моҳи август фармонеро имзо намуд, ки мутобиқи он аз 1 сентябри соли равон дар мамлакат ҳаҷми нафақаҳои меҳнатию иҷтимоӣ баробари 25 фоизи ҳаҷми муқарраршудаи нафақаи ҳадди ақал зиёд карда шуд.
Хотирнишон месозем, ки ҳаҷми ҳадди ақали нафақа дар Тоҷикистон 80 сомониро ташкил медиҳад, ки мутобиқи он ҳаҷми нафақаҳои меҳнатию иҷтимоӣ баробари 20 сомонӣ афзудааст.
