Имрӯзҳо дар вилояти Суғд 13 боғи фарҳангу истироҳат, 228 маҳфил, 350 китобхона, 5 театри халқӣ ва 6 театри касбӣ фаъолият доранд, ки аз ҷумлаи онҳо 147 китобхона ва 74 маҳфилаш таъмирталаб аст.
Хуҷанд, 5 июл. - «Теъдоди умумии кормандони соҳаи фарҳанги вилоят 2371 нафарро ташкил медиҳад, ки 410 нафараш дорои маълумоти махсуси олӣ ва 1069 нафари дигарашон дорои маълумоти миёна мебошанд»,- дар ин бора Раиси вилояти Суғд Қоҳир Расулзода 30 июни соли ҷорӣ дар суханронии худ дар мулоқот бо раисони шаҳру ноҳияҳо, кормандон, роҳбарон ва собиқадорони идораҳои фарҳангии вилояти мазкур иттилоъ дод.
Тибқи суханони раиси вилоят тӯли даҳ соли охир маблағгузорӣ ба соҳаи фарҳанги вилоят 58 маротиба афзудааст. Бо ибораи дигар, агар дар соли 2001 барои соҳаи фарҳанг 511 ҳазор сомонӣ ҷудо шуда бошад, дар соли 2011 ин нишондод ба 29,7 миллион сомонӣ расидааст.
Ба ғайр аз ин аз ҳисоби аз нақша зиёд иҷро шудани қисми буҷаи вилоят барои эҳтиёҷоти ин соҳа танҳо дар 5 соли охир ба таври илова 4 миллион сомонӣ ҷудо гардид. Ин маблағ барои тармими хонаҳои фарҳанг ва китобхонаҳои шаҳру ноҳияҳои Чкаловск, Мастчоҳ ва Спитамен истифода шудаанд.
Қ. Расулзода супориш дод, ки Барномаҳои махсуси рушди соҳаи фарҳанг дар шаҳру ноҳияҳо таҳия намуда ва дар доираи ин Барномаҳо маҳфилу китобхонаҳо ва дигар муассисаҳои фарҳангӣ давра ба давра таъмир карда шаванд.
Дар қисми дуюми ин чорабинӣ роҳбари вилоят ба суолҳои кормандони соҳаи фарҳанг марбут ба масъалаи ҳифзи ҳуқуқҳои муаллиф ва фарсудагии асбобҳои мусиқӣ ҷавоб дод.
Раиси вилоят аҳли нишастро бовар кунонид, ки роҳбарияти вилоят барои дастгирии молии бахши фарҳанг ҳамеша омода аст, зеро тибқи гуфтаи суханони Қоҳир Расулзода «фарҳанг ва анъанаҳои миллиамон симои миллатанд».
