22 июни соли 2011 вазири корҳои хориҷии Ҷумҳурии Тоҷикистон Ҳамрохон Зарифӣ аз Сафири Фавқулодда ва Мухтори Ҷумҳурии Қазоқистон дар Ҷумҳурии Тоҷикистон Смагулов Агибай Динкенович нусхаи Эътимоднома қабул намуд.
Душанбе, 23 июн. - Пас аз маросими супоридани нусхаи Эътимоднома мулоқоти ҷонибҳо доир гардид, ки зимни он вазири корҳои хориҷӣ Сафири Қазоқистонро ба ин муносибат табрик намуда, дар фаъолияти ӯ ҷиҳати таҳкиму густариши муносибатҳои дуҷонибаи Тоҷикистону Қазоқистон муваффақиятҳо таманно намуд.
Вазир ба рушди бомароми робитаҳои бисёрҷанбаи дуҷониба баҳои баланд дод. Ӯ татбиқи нақшаҳои мутақобилан муфидро муҳим дониста, зарурати тавсеаи робитаҳои тиҷорию иқтисодии байни ду кишварро таъкид намуд.
Сафир аз ҷониби худ барои фароҳам овардани имкони мулоқот ва муҳокима намудани масъалаҳо миннатдорӣ баён намуда, ваъда дод, ки тамоми саъю кӯшиши худро барои рушду таҳкими муносибатҳои Тоҷикистону Қазоқистон равона хоҳад кард.
Дар рафти мулоқот ҳамчунин мавзӯъҳои ҳамкорӣ дар доираи созмонҳои байналмилалӣ ва масъалаҳои минтақавӣ мавриди баррасӣ қарор гирифтанд. Майлу рағбати ҳарду тараф ҷиҳати густариши минбаъдаи муносибатҳо ва ҳамёрии мутақобилан судманд дар соҳаҳои гуногун таъкид гардид.
