11 июн дар Театри давлатии ҷавонони ба номи М. Воҳидов намоишномаи нави Шӯрои бадеии Вазорати фарҳанги Ҷумҳурии Тоҷикистон таҳти унвони «Меҳмони бефарҳанг» ба намош гузошта мешавад.
Душанбе, 9 июн. - Нахустнамоиши «Меҳмони бефарҳанг» 14 июн намоиш дода мешавад.
Муаллифи намоишнома коргардон ва ҳунарманди театри мазкур, Ҳунарманди мардумии Тоҷикистон Шодӣ Солеҳ буда, ӯ ҳамчунин иҷрокунандаи яке аз нақшҳои асосӣ ба ҳисоб меравад. Намоишнома ба мавзӯи доғи рӯз бахшида шуда, дар жанри ҳаҷв ба саҳна гузошта шудааст.
Дар ин намоишнома нақшҳоро Ҳунарманди мардумии Ҷумҳурии Тоҷикистон Насриддин Нуриддинов, Гулбӣ Абдулхайрова, Сӯҳроб Ҷанҷолов, Шералӣ Уроқов ва Баҳром Обидов иҷро менамоянд.
Баъди намоиш дар театри мазкур ҳунармандон аз 16 то 22 июни соли ҷорӣ ба ноҳияҳои водии Рашт сафар намуда, ба сокинони ноҳияҳои Тоҷикобод, Нуробод ва Ҷиргатол «Меҳмони бефарҳанг»-ро пешкаш менамоянд.
Ғайр аз ин, бахшида ба Рӯзи Ваҳдати миллӣ гурӯҳи Театри ҷавонон намоишномаи «Шабе дур аз Ватан»-ро дар таҳияи Нозими Малик омода намудаанд. Ин намоишнома дар Фестивали «Парасту 2011» сазовори ҷойи дуюм гардида, Абдумӯъмин Шарифӣ барои иҷрои нақши беҳтарини мардона сазовори диплом гардида буд. Рӯзҳои таҷлили иди Ваҳдат – 26- 27 июн дар толори Театри ҷавонон ин намоишнома ба тамошои сокинони пойтахт гузошта мешавад.
