Душанбе, 2 июн. - Дар робита ба ин ҷиҳати таҷлили ин сана дар пойтахт Раиси шаҳри Душанбе Маҳмадсаид Убайдуллоев қарор ба имзо расонид.

Тибқи он Рӯзи байналмилалии ҳифзи муҳити зист 5 июни соли 2011 дар назди бинои Филармонияи давлатии Тоҷикистон ба номи Акашариф Ҷӯраев таҷлил карда мешавад.

Ҳамзамон дар асоси ин қарор нақша - чорабиниҳои шаҳрдорӣ тарҳрезӣ гардидаанд, ки тибқи он дар мактабҳои таҳсилоти умумӣ бахшида ба 20- солагии Истиқлолияти давлатии Ҷумҳурии Тоҷикистон таҳти унвони «Ҳифзи муҳити зист дар даврони соҳибистиқлолӣ» озмун гузаронида шуда, амалиёти «Тозагии соҳил- 2011» дар ҳавзаи дарёҳои Варзоб, Душанбе, Лучоб ва Кофарниҳон ташкил мешавад.

Инчунин, баргузории конфронси илмӣ – амалӣ дар доираи «Амалиёти даҳсолаи об барои ҳаёт» дар мавзӯи «Об – мӯъҷизаи табиат» мизи мудаввар ва нишастҳо дар донишкадаву донишгоҳҳо ва коллеҷу омӯзишгоҳҳо роҷеъ ба баланд бардоштани маърифат ва тарбияи экологии ҷавонон, маърифати экологӣ ва фарҳанги шаҳрнишинӣ дар назар аст.

Бахшида ба Рӯзи байналмилалии ҳифзи муҳити зист намоиши расмҳо таҳти унвони «Гӯшаҳои табиат» дар мавзӯъҳои экологӣ ва фаъолияти гурӯҳи «Патрули сабз» созмон дода мешавад. Дар аоси ин қарор муовини аввали Раиси шаҳри Душанбе Насрулло Хайруллоев ва Раиси ноҳияи Сино Зафар Сафаров муваззаф гардидаанд, ки барои дар сатҳи баланд таҷлил намудани ин сана тадбирҳои мушаххас андешанд.