Душанбе, 1 июн. - Нахуст Президенти ҶТ Эмомалӣ Раҳмон суханронӣ намуда, кӯдакону наврасони мамлакатро бо Рӯзи байналмилалии ҳифзи кӯдакон табрик намуд.

Эмомалӣ Раҳмон зикр намуд, ки «мақсад аз баргузории фестивали мазкур фароҳам овардани шароити мусоид барои вусъати нерӯи эҷодӣ ва қобилияти кӯдакону наврасон, дарёфти чеҳраҳои нав - овозхонҳо, навозандагон, раққосон, наттоқон, ровиён, рассомон, наққошон, кандакорон ва дигар ҳунармандон, ташвиқу тарғиби ҳунари истеъдодҳои асил ва муҳайё намудани шароити мусоид барои ривоҷу равнақи суннатҳои миллӣ, тарбияи завқи маънавии кӯдакону наврасон дар рӯҳияи ватандӯстӣ мебошад».

Ҳамаи нафароне, ки дар ҷашнвораи имрӯза иштирок намуда ҳунару истеъдоди худро намоиш доданд, ғолиб эълон гардиданд.

Ҳамчунин, Президенти мамлакат ба масъулин супориш дод, ки аз фонди захиравии Президенти кишвар ба ҳар як иштирокчии фестивали мазкур 300 сомонӣ маблағ ҳамчун тӯҳфа тақдим карда шавад.

Ин иқдоми Президенти мамлакат дар Рӯзи байналмилалии ҳифзи кӯдакон аз ҷониби аҳли толор ҳамчун ифодаи ғамхориҳои пайвастаи Ҳукумати ҷумҳурӣ ба созандагони фардои ҷомеа маънидод гардид.

Барномаи ҳунарии ғолибони фестивали ҷумҳуриявии кӯдакон ва наврасони ҳунарманд «Сапеда-2011» ба ҳозирин писанд омад, зеро фарогири ғояҳои баланди ватандӯстиву хештаншиносӣ ва эҳтирому садоқат ба арзишҳои волои инсонӣ буд.

Бояд ёдовар шуд, ки ҷашнвора ё фестивали эҷодиёти бадеии ҷавонон ва наврасон бо номи «Сапеда», ки аввалин маротиба бо дастгирӣ ва маблағгузории Ҳукумати Тоҷикистон дар тамоми шаҳру ноҳияҳои мамлакат гузаронида шуд, аз ҷумлаи тадбирҳое мебошад, ки Ҳукумати мамлакат ба хотири рушди маънавӣ ва тарбияи зебоишиносии наврасону ҷавонон амалӣ менамояд.

Президенти кишвар Эмомалӣ Раҳмон зимни суханронии худ зикр намуд, ки «рӯзи байналмилалии ҳифзи кӯдакон на танҳо рӯзи таърихӣ, балки айёми ба ҷомеа ёдовар шудан аз зарурати риоя ва эҳтироми ҳуқуқи кӯдак ва фароҳам овардани шароит барои ташаккули ҷомеаи инсонпарвару адолатпарвар аст. Аз ин лиҳоз, ин рӯз иди калонсолон низ мебошад. Зеро кӯдакон ниёз ба ғамхории доимӣ доранд ва калонсолон дар таъмини ниёзу эҳтиёҷи онҳо масъуланд».

Яке аз ҳуқуқҳои бунёдии кӯдакон ҳуқуқи бо падару модар якҷоя зиндагӣ кардан ва дар оилаи солим тарбия ёфтан аст. Мутаассифона, имрӯз имкониятҳои тарбиявии оила то андозае суст шуда, шумораи кӯдаконе, ки аз муомилаи ноадолатонаи падару модар азият мекашанд, афзудааст,- изҳори нигаронӣ намуд сарвари давлат.

Вазорати фарҳанг бо супориши Ҳукумати Тоҷикистон аз ҳисоби мутахассисони касбии соҳаи санъат гурӯҳи корӣ ташкил намуда, ин чорабиниро аз моҳи марти соли равон оғоз намуд ва он имрӯз ба ифтихори Рӯзи ҳифзи кӯдакон ҷамъбаст гардид.

Ёдовар мешавем, ки мақсади асосии ҷашнвора пайдо ва муайян намудани захираи кадрии соҳаи фарҳангу санъат мебошад ва ғолибон-наврасони ноҳияҳои дурдасти мамлакат минбаъд таҳсили касбии худро дар таълимгоҳҳои санъат идома хоҳанд дод.