Душанбе, 27 апрел. - Дар расми кушодашавии намоишгоҳи мазкур вазири фарҳанги ҶТ Мирзошоҳрух Асрорӣ суханронӣ намуда зикр кард, ки «Китоб ҳамчун сарчашмаи маънавиёт аз нахустин лаҳзаҳои таълифу ворид шудан ба нашриёт ва то ба дасти хонанда расидан зинаҳои мухталифи заҳмати мушкили пурэҳсоси муаллифон, муҳаррирон, тарроҳон, чопгарон ва фурӯшандагонро мегузарад».
Боиси ифтихор аст, ки ноширони мамлакат дар даврони истиқлолият дар бисёр намоишгоҳҳои байналмилалии китоб, аз ҷумла Теҳрон, Москва, Тошканд, Санкт-Петербург, Олмон, Ереван, Ашқобод иштирок намуда, дастовардҳои Тоҷикистони соҳибистиқлолро ба мардуми олам муаррифӣ намуданд,- афзуд М.Асрорӣ.
Дар намоишгоҳ ноширон, кормандони чопхонаҳо, тавзеҳкунандагони китоб, оҷонсиҳои адабӣ ва иттилоотӣ, сафирону намояндагони кишварҳои хориҷӣ, созмонҳои байналмилалии муқими Тоҷикистон иштирок намуда, дар гӯшаҳои ба ихтиёрашон гузошташуда нашрияҳои даврӣ, албому китобҳои мусаввар ва дигар маводи чопиро ба намоиш гузоштанд.
Зикр гардид, ки аз ҷониби муассисаҳои нашриявӣ тӯли соли охир дар маҷмӯъ 760 номгӯй бо теъдоди 54 ҳазору 362 нусха китоб тариқи ройгон ба муштариён дода шудааст, ки маблағи умумии он 291 ҳазору 169 сомониро ташкил медиҳад.
«Намоишгоҳи байналмилалии «Китоби Душанбе», ки се рӯз- аз 25 то 27 май баргузор мешавад, дарвоқеъ дар омӯзиши таҷрибаи байниҳамдигарии ноширону иштирокчиёни ин чорабинии муҳим нақши муассир гузошта, дар рушду такомули соҳаи табъу нашр ва ғанӣ гардонидани хазинаи китобхонаҳои кишвар такони тоза хоҳад бахшид»,-таъкид намуд дар охир М. Асрорӣ.
